《智能愛人》情節及演員與《理想國》撞晒 監製陳翹英話係特登?

無綫劇集《智能愛人》以AI為題材，除咗李佳芯（Ali）、泰臣及簡淑兒等人喺劇中飾演AI智能機械人之外，早兩日劇情就講到原來小智都係智能機械人。喺第22集，劇情就講到小智媽媽袁太（葉凱茵飾）對小智非常嚴厲，不停強迫小智溫習，就算係佢生日都要不停做練習，最終搞到小智抵受唔住壓力跳樓自殺。之後，袁生得知AI公司可以訂做新款智能機械人，於是佢就訂製咗一個同小智一模一樣嘅智能機械人去安撫傷心欲絕嘅太太，從而代替已經自殺身亡嘅小智。近日有報道指網民發現呢個情節與ViuTV劇集《理想國》單元《苟延殘喘》如出一轍，兩套劇嘅「兒子」都係同一位小演員飾演，而兩劇嘅監製編審都係陳翹英。情節同演員都一樣，唔通佢自己抄自己？

ViuTV劇集《理想國》單元《苟延殘喘》講到媽媽（吳綺莉飾）以嚴厲方式教囝囝做功課，但囝囝做極都唔識，最終囝囝抵受唔住壓力跑去廚房跳樓自殺。之後，老公向科技公司租借與囝囝一模一樣嘅智能機械人，等老婆可以同「囝囝」愉快相處7日。

陳翹英接受傳媒訪問，佢就話係特登將《理想國》呢段情節搬去《智能愛人》，而演員亦係特登用同一位，係向知名導演史提芬史匹堡致敬，因為呢個故事係參考第一套講Al嘅電影《人工智能》（A.I. Artificial Intellgence）。唔可以話自己抄自己，因為佢都係企喺巨人肩膀上。另外，佢仲大讚小演員演技出色，有機會嘅話會搵佢再合作。

按此下載Yahoo APP 9月免費送一萬個蛋撻王Q嘜蛋撻，仲有貓山王榴蓮冰皮月餅/鳳梨奶黃月餅同你賀中秋，立即下載！