《梅艷芳》女主角 盛傳係國際名模王丹妮 舊年帶6歲女嫁羅孝勇

一直盛傳有片商開拍以一代香港天后梅艷芳生平嘅傳記電影，並且由《寒戰》導演之一梁樂民執導。呢套電影尋日終於有宣傳片出街，但係只係交代梅姐生前最後紅館show嘅場面，飾演梅姐嘅演員仲係背向鏡頭，相當神秘。

電影籌拍期間已經傳出演梅姐嘅係現年31歲嘅名模王丹妮(Louise)，不過消息未得到證實。王丹妮雖然未拍過電影，但原來大有來頭。

出身單親家庭嘅Louise，13、14歲就做兼職幫補家計，17歲讀時裝設計時參加模特兒比賽出線成為香港區代表，後來參加亞太區總選再下一城奪冠，因此簽約國際級模特兒公司，參與過Chanel 及Dior等品牌喺巴黎、米蘭嘅fashion show。

正當名氣上升之際，Louise 24歲時意外懷孕，誕下囡囡Affa，仲為個女回流香港。後來Louise同男友分開，獨力撫養女兒。喺訪問中Louise提到以為自己唔再談戀愛，但喺2016年就同林欣彤舊愛、「巨聲幫」羅孝勇（Sheldon）撻著。Louise盛讚Sheldon對自己好之餘，亦非常照顧Affa，樂意扮演父親角色。Louise 同Sheldon舊年低調入紙結婚，被傳媒搵到擬結婚通知書先承認喜訊。

由於Louise冇拍過電影，所以唔少人一度以為《梅艷芳》女主角係拍過《花千骨》嘅內地女演員王丹妮。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！