雅虎香港新聞 《死侍與狼人》開畫全球收4.38億美元 打破今年最高開畫票房紀錄︳電影LOL
迪士尼同Marvel出品嘅《死侍與狼人》剛開畫，兩大角色首度碰頭加上宣傳做得極充足，票房好係理所當然，問題只係收幾多。根據外媒最新數字，《死》片喺北美本土開畫票房錄得2.05億美元（下同），而海外就收到2.33億，合共有4.38億元，係暫時今年北美以至全球最高開畫票房電影，成績相當亮麗。
《死侍與狼人》片中有大量粗口俗語，迪士尼同Marvel寧願以美國電檢R級上畫（17歲以下觀眾需由成人陪同入場，相當於香港IIB級）都要保留原汁原味，結果票房依然亮麗，甚至成為美國最高開畫票房R級片，超越《小丑》同埋《死侍》2套賣座R級片。
票房報捷，「死侍」Ryan Reynolds喺IG發 Story表示未消化到（This is kind of hard to process），並多謝剛過去周末入場嘅觀眾。
對去年票房失利嘅迪士尼而言，今個暑假可謂吐氣揚眉。早前嘅《玩轉腦朋友2》至今全球總票房高達15億美元，成為史上最賣座動畫片。《死侍與狼人》以走勢睇都有望挑戰全球10億票房，加上周末喺Comic Con公布Robert Downey Jr.回歸Marvel宇宙並於2026年嘅《復仇者聯盟》演末日博士Dr. Doom，迪士尼同Marvel成個勢返晒嚟。
其他電影方面，尼古拉斯基治主演嘅《Longlegs長腿》過去周末收670萬美元，累收5860夢元，令電影成為出品公司Neon最高票房作品，之前嘅紀錄係由南韓電影《上流寄生族》保持，《上》北美總收5300萬票房。而由台裔美籍導演王湘聖執導嘅《弟弟》周末以小規模放映，但5間戲院合共收20萬元，成績令人驚喜、《弟弟》將保持由少量戲院放映嘅模式，下周大約再於另外50間戲院上畫。
更多電影文章
死侍與狼人／劇場總集篇 孤獨搖滾！Re:／DDDD惡魔的破壞 後章︳電影LOL
四小姊弟遇空難流落亞馬遜森林40日奇蹟生還 真人真事將改編成電影︳電影LOL
班頓費沙接拍登陸諾曼第電影Pressure 演艾森豪威爾將軍 有望再爭影帝︳電影LOL
等足7年 麥浚龍執導億元鉅製《風林火山》傳年底上映 金城武拍完神隱︳電影LOL
笑匠Jack Black樂隊隊友抽水特朗普中槍「下次射準啲」惹爭議 宣布取消巡迴演出︳電影LOL
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
