班頓費沙接拍登陸諾曼第電影Pressure 演艾森豪威爾將軍 有望再爭影帝︳電影LOL

呢期美國總統選舉新聞好睇程度拍得住暑假大片，而今日就傳出去年奧斯卡影帝班頓費沙(Brendan Fraser）將會喺新片Pressure飾演二戰時盟軍歐洲總司令、美國前總統艾森豪威爾。

艾森豪威爾係美國9位五星上將之一，二戰時被任命成為盟軍歐洲總司令，對抗納粹德國、意大利組成嘅軸心國，策劃著名嘅諾曼第戰役，成功帶領盟軍登陸法國，拿下二戰最重要一役。盟軍登陸前，英國天氣不似預期，海空部隊難以喺惡劣天氣下出動，但係延遲發動攻擊，又有可能令德軍情報人員得知盟軍行動。Pressure嘅故事就係講述，由Andrew Scott飾演嘅英國天文台首席氣象學家James Stagg，喺登陸諾曼第嘅D-Day前72小時，奉命提供舉足輕重嘅天氣預測，令盟軍及時喺天氣許可環境下起行，一旦有任何差池，足以影響百萬人性命。而班頓費沙飾演身為作戰大腦嘅艾森豪威爾將軍，同James Stagg一樣如履薄冰作出決策。片名語帶雙關，Pressure可以解作氣壓，亦吻合片中各方處於嘅緊張局面，寫完都覺得個故事夠晒緊張有戲味，而且仲要係真人真事！

二戰結束後，艾森豪威爾統領北約，後來更成功當選美國總統，任內結束韓戰並帶領美國進行二戰後重建。不過呢啲都係後話，但證明美國人心目中艾森豪威爾嘅地位相當重要。人物傳記、真人真事歷史電影係頒獎禮寵兒，班頓費沙憑Pressure絕對有機會再次衝擊頒獎台。

至於同班頓費沙演技較勁嘅Andrew Scott，喺Benedict Cumberbatch主演嘅英劇Sherlock Holmes飾演福爾摩斯死對頭Moriarty，同Benedict一齊一劇成名，近作電影有All of Us Strangers，近排仲憑劇集Ripley獲提名艾美獎短篇劇最佳男主角。Pressure將會由Hotel Mumbai導演Anthony Maras執導，預計今年9月喺英國開拍。

更多電影文章

龍捲風／名偵探柯南 100萬美元的五稜星／末日廝殺橋／陽子之旅︳電影LOL

等足7年 麥浚龍執導億元鉅製《風林火山》傳年底上映 金城武拍完神隱︳電影LOL

笑匠Jack Black樂隊隊友抽水特朗普中槍「下次射準啲」惹爭議 宣布取消巡迴演出︳電影LOL

許光漢王淨歸隊查案《關於我和鬼變成家人的那件事》被Netflix睇中拍外傳劇 《正港警局》︳電影LOL

居然唔太得人驚嘅殭屍片？《人道主義吸血鬼徵求自願獻身者》︳電影LOL

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！