《瞬間直擊半小時》開名報郭嘉駿＠ERROR交通意外 TVB同193一早有牙齒印?

日前有網路片段影到，ERROR成員193（郭嘉駿）懷疑揸住法拉利座駕倒車時撞倒一位婆婆，婆婆疑似受傷。目擊者指193只係落車道歉，未有報警就離開。而193其後喺IG發限動交代，指事後已經向警方備案。而警方證實接到一名34歲男子報案，表示於前日下午喺紅磡美善同道揸車時，懷疑撞到一名女子，案件現列作「交通意外報告」。

TVB節目《瞬間直擊半小時》以播放網路短片為主要內容，而節目尋晚一開頭就選播193交通意外事發片段，並且開名指涉事藝人係193郭嘉駿。主持之一嘅洪永城隨後讀出193事發後嘅交代post，但未有讀出尋日193另一個喺限動回應交通意外嘅post。193最新帖文提到「我最怕係見到網上不實嘅報道話我不顧而去，例如將啲片Cut頭cut尾，令痛錫我嘅人見到呢啲不實嘅資料會唔開心甚至同人鬧交」。

193同TVB都幾有「淵源」。ERROR初成團時曾拍攝網上節目《肥仔大冒險》，其中一集193自稱係明星想硬闖TVB電視城。後來曾志偉成為TVB高層，指ViuTV節目收視得4點，只可以同J2相題並論，193其後回應時指收視得幾百部電視機，佢哋不嬲都唔理，並且反問「J2係做咩？冇記錯係咪40幾歲仲話後生仔傾偈嗰個？」，被指相當寸嘴。後來193承認當日講錯說話，強調唔係針對曾志偉。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！