《立會好聲音》傳受民政專員餞別宴風波影響停辦 主辦單位：現時並不宜舉行

16:15 8月29日更新

主辦單位藍星行動表示，經商討後現時並不宜舉行，決定取消活動。

8月29日更新︰《立會好聲音》可能停辦

近日黃大仙民政事務專員黃大仙民政事務專員黃智華下月北上進修，近日地區人士為黃舉行大規模歡送宴，引發唔少風波，令公職人員參與活動備受關注。有消息指，原定下周舉行、由多位立法會議員演出嘅《立會好聲音》音樂會，有可能因此暫停舉行。有報導引述消息指，製作公司可能於明天公布活動最新安排。

－－－－

立法會議員開金口嘅地方，唔止得議事廳。今日有報導指多名唔同黨派議員，下個月8號將會喺灣仔伊館舉行《立會好聲音》慈善音樂會，至少有13名議員演出，門票將會免費派發。

議員議政質素，睇電視都知多少，但邊個係唱得之人？最多人知嘅應該係曾被稱為「翻版桂綸鎂」嘅新民黨副主席容海恩。以前都有「家嫂」上台演唱嘅片段喺網上流傳，嗓音低沉有磁性，甚至被稱為「立法會梅姐」！更勁嘅係容海恩今年上過湖南衛視《我想和你唱》演出，佢受訪時仲話以前有玩音樂，難怪《立會好聲音》一定預埋佢。

至於立會顏值代表江玉歡（歡姐）都會參加《立會好聲音》，早排佢參加地區活動時開金口，甚至有朋友拉隊舉燈牌支持，哇～唔知有跳鋼管舞嘅歡姐，到時會唔會露兩手呢？

而家MIRROR咁勁，查實立法會都有男團，成員有管浩鳴、梁毓偉、自由黨李鎮強、民建聯陳學鋒、梁熙及顏汶羽，佢哋早兩日又係喺地區活動臨時拉伕「出道」，仲話希望隊名唔好叫Horror。而管浩鳴之前一個地區音樂會上，梁熙（即係話爭取西灣河起地鐵嗰位）仲自彈自唱，原來佢有作曲經驗添。不過由於《立會好聲音》撞正民建聯籌款晚會，梁熙應該去唔到，大家可以捕下佢嗰區幾時再有音樂會啦吓～

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！