《逆天奇案》昨晚首播 網民大讚緊湊有電影感 點解錢小豪要配音

無綫新劇《逆天奇案》由陳展鵬、林夏薇、馮盈盈、黃智賢、蔣祖曼、張頴康及劉佩玥等人主演，劇情主要講述「O記雙雄」陳展鵬和黃智賢連同CIB情報科探員林夏薇組成破案鐵三角，解決多宗棘手奇案。劇集拍攝完畢差不多一年半，喺噚晚終於首播，而家就同大家睇下網民有咩反應啦！

劇情緊湊有電影感
劇情以懸疑、警匪、律政為題材，喺首集劇情已經非常緊湊，除咗已經清楚交代男女主角背景之外，仲有兩場激烈槍戰，尤其係尾段反恐演習時多位飛虎隊隊員被恐怖份子擊斃，令到網民都睇都相當肉緊，仲紛紛留言話會追落去，例如「開場幾緊湊，會追落去」、「「拍得好有電影feel，好睇」」、「第一集幾好，有追看性」、「節奏快，冇悶場，拍番以前tvb警匪劇水準 ，劇本資料搜集做得好，第一集好睇。比伙記辦大事好好多。」、「尾場電影級水準」及「終於有套似樣啲嘅劇睇喇」等等。

錢小豪都要配音好奇怪
《逆天奇案》有華麗嘅客串陣容，第一集就有相隔4年再返無綫拍劇嘅錢小豪，佢喺劇中飾演飛虎隊隊長張耀祈，雖然佢只係客串性質，不過就有大量動作場面，首集尾段更要與恐怖份子搏鬥，可惜最後被恐怖份子開槍射中太陽穴身亡。唔少網民見到錢小豪登場都好興奮，不過一聽到佢把聲竟然係用配音時，網民們都覺得好奇怪同感覺格格不入，紛紛留言話：「配音古古怪怪」、「就算第一集就死都唔使配音㗎，又唔係唔識廣東話」、「點解錢小豪要配音」、「配音做乜???」及「點解嘅?我都唔明!好怪lor」等等。

有楊卓娜就有寡婦
有「TVB御用寡婦」之稱嘅楊卓娜，多年嚟飾演過唔少寡婦及單親媽媽角色，而今次《逆天奇案》都唔例如，佢喺劇中飾演錢小豪嘅老婆，而錢小豪喺第一集尾段就被恐怖分子射殺身亡，甚至有網民一見到楊卓娜出現，就已經預計到錢小豪會死，留言話：「楊卓...即係小豪rip」、「見到娜姐就知錢小豪要死。」、「娜姐又做寡婦,又喊」及「霞姐又做咗寡婦啦！」等等。

林夏薇靚女又好戲
現年33歲嘅林夏薇（Rosina），對上一次擔正嘅劇集已經係2019年嘅《十二傳說》。今次佢喺劇中飾演刑事情報科警長馬穎思（Wing），與陳展鵬飾演嘅許浚森係情侶關係，二人感情穩定。唔少網民一見到薇薇出場，即刻留言大讚佢有樣有演技，例如「鍾意林夏薇！好正！又靚又演得！同展鵬有CP感！」、「有薇薇,養眼好戲一定睇」、「林夏微又真係幾靚女」及「林夏薇正到無朋友」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！