「亞視一姐」薛影儀獲准保釋 網民錯重點指經理人林寶玉好省鏡

現年37歲「亞視一姐」薛影儀（阿儀），早前被爆喺上年9月寓所樓下冇戴口罩，有街坊拍片公審佢，期間阿儀「起飛腳」踢人，片段喺網絡瘋傳。事後警方根據網片資料起訴阿儀一項「普通襲擊罪」及違反第599I章《預防及控制疾病（佩戴口罩）規例》，案件喺噚日（22日）提堂，阿儀承認控罪，法官判佢入獄2周及罰款5千港元。阿儀於下午透過代表律師申請保釋等候上訴獲批，而其經理人林寶玉就指公司會承擔律師費及可能會上訴。不過網民們似乎錯重點，話點解紅嘅係阿儀而唔係經理人林寶玉。

32歲嘅林寶玉（Connie）喺《亞洲小姐競選》「人氣網絡大獎」得主，擁有弗爆身材，亦因外形與陳法拉相似，而被封為「翻版陳法拉」。之後，佢客串唔少TVB劇集，例如《愛·回家之開心速遞》、《金宵大廈》及《智能愛人》等等。除咗係一名藝人之外，早前佢更升任為ATV藝人經理，成為薛影儀嘅經理人，負責管理阿儀嘅工作安排。瓣數多多嘅Connie亦喺上年創辦美容服務中心，當時更邀請一班應屆亞姐得主及亞視高層到新店做開幕嘉賓，另外佢仲開設名牌二手及代購店，認真有生意頭腦呀！

之前唔係好多人知道阿儀嘅經理人係林寶玉，當網民知道後都留言話佢靚同問點解紅嘅唔係經理人林寶玉，例如「點解會唔係個經理人紅」、「林寶玉正喎」、「林寶玉自己出黎做藝人好過喇」、「點解林寶玉唔出嚟做藝人」、「林寶玉好索」、「經理人自己做埋ARTIST都得啦」、「我願意為咗佢犧牲阿儀」及「兩個身份掉轉左」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！