「令妻子昏迷至今」19年 「李先生」張滿源同王祖藍同屆演藝畢業 而家係型男神學生

政府宣傳片唔少都好高質，因此深入民心過唔少廣告。除咗「電視節目有好多種」（廣管局宣傳片）之外，道路安全議會多年前播放嘅「做個盡責同路人」都係網民集體回憶。

呢輯廣告分別有3條片，其中一條開頭係太太同丈夫嘅家居錄像，突然插入幾張撞車圖片，旁白就話「2002年7月9日，李先生超速駕駛引致車禍，令妻子昏迷至今」。

唔少網民都喺每年7月9日，提起呢單「悲劇」，數數下原來「李太」都昏迷咗19年。早幾日都有討論區出post懷念，想知「李太」醒返未。

而電影導演陳詠燊就出post提起呢條片，仲介紹「李先生」俾大家認識，飾演「李先生」嘅係演員張滿源。張滿源原來大有來頭，係演藝學院戲劇學院畢業生，同屆畢業嘅有王祖藍、白只、湯駿業、梁嘉琪等。張滿源後來憑電影《PTU》獲提名第23屆香港電影金像獎最佳新演員，最後輸俾安志杰。後來多數演綠葉角色，而且為生計仲試過做場務同疊報紙，又喺電影界同舞台劇界兩邊走，亦自言因為「分散投資」而無乜成績。早幾年更試過俾向來賞識佢嘅張家輝相中出埠拍戲，但因為同舞台劇撞期而要放棄。

而家嘅張滿源修讀緊神學，近期亦有參演C ALLSTAR《沒明日的恐懼》MV、電影《遺愛》及《濁水漂流》等。「李先生」而家成個成熟咗，佢亦都有喺facebook為「李太」送上祝福「19年，不是一個短的年日，2002年至今，世界已不一樣，幸而李太這一刻仍昏迷，她太幸福，冀願她醒來時，有一個美好的世界等著她」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！