45歲官恩娜被質疑美顏濾鏡出手太重 現身反擊網民兼大呻冤枉

官恩娜（Ella）家族爭產案成為熱話，不過日前官恩娜未有出席聆訊，反而去咗蒙古旅行，並於社交平台分享一條身穿傳統民族服飾嘅影片，以及大談旅行體驗。唔少網民都大讚官恩娜人靚景靚，但有一名網民就留言指質疑官恩娜用美顏濾鏡用得太重手，惹官恩娜於IG限時動態反擊，並大呻冤枉。

官恩娜即使已淡出娛樂圈，但好多網民都極關注佢嘅社交平台，希望睇到多啲佢嘅生活照及索爆造型照，唔少網民過往都大讚官恩娜仍舊青春，完全唔似其真實年齡。日前，官恩娜PO出蒙古旅行短片，從片中所見，官恩娜無論係便服定係民族服裝造型都非常青春，而且皮膚白滑。唔少網民都激讚官恩娜靚女：「點解點解，可以咁靚」、「甚麼服飾都著得好好睇」、「變身蒙古公主了啦」、「這個衣服太好看啦！！！最重要是人好看」、「人靚景靚，好正」、「真心靚！」等等，不過有網民質疑官恩娜過度使用美顏濾鏡：「啲美顏勁得滯，矇晒」。

此言論令官恩娜親身回覆，澄清無用美顏：「我發誓我冇開美顏！ 不如你睇清楚先啦，你係咪講食麵嗰度啊？ 我用前鏡拍攝可能清晰度冇咁高。 用美顏唔係咁嘅樣㗎！」網民再回應指：「sorry 男士，你天生麗質，從來冇用美顏我錯」，之後官恩娜再表示自己對得住天地良心：「唔知你係咪真心講sorry但係我真係冇用美顏，對得住天地良心！你要講得咁仔細，以前影雜誌啲雜誌自己都會執吓相咁算唔算美顏？同朋友去食飯個朋友自己用咗美顏咁我算唔算用過？但係我呢條片絕對冇用美顏令到我塊面嘅面形輪廓皮膚有任何嘅改變！」隨後，有自稱10幾年忠粉嘅網民替官恩娜講說話，表示真心相信官恩娜無用美顏；又有網民力撐官恩娜靚到唔洗用美顏：「我就開咗美顏啦，你究竟識唔識分架，恩娜咁靚，唔駛開啦，而且d衫既顏色也沒有色差！」官恩娜又於IG限時動態貼上該網民嘅留言截圖，委屈地表示：「畀人冤枉用美顏，要搵包青天幫我主持公道！」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！