黑色月光 ｜楊卓娜泉湧式喊戲勁搶！一場喊戲6種情緒 與視后親妹妹鬥飆戲

《黑色月光》昨晚（13日）一集焦點，絕對落在無綫實力綠葉演員楊卓娜（Lenna）身上，Lenna昨晚一口氣應付了三場喊戲，其中一場與楊茜堯的「親姊妹對喊戲」不但長達3分35秒，Lenna更要邊喊邊講對白，及一再變化的六大情緒起伏—憤怒、扮衰、不甘、委屈、感恩及無助，與視后級親妹楊茜堯同樣好戲，兩人單是眼神飆戲已無聲勝有聲，令場口倍添精彩。

昨晚劇情講述蔣基俊（馬志威飾）遇交通意外身亡，柏中（楊明飾）與曦晨（黃翠如飾）為余滿月（楊茜堯飾）報仇成功歡天喜地，惟獨大家姐余漫星（楊卓娜飾）不是味兒。18年前的強姦及滅口不遂事件，不但影響了當事人滿月及曦晨，亦影響了漫星，大好婚事因而被摧毁外，亦令漫星多年來活在自責及擔驚受怕之中…

昨晚漫星得知滿月瞞著自己多年進行報仇大計後大表激動，於家庭聚會中拂袖離場。滿月之後去到漫星工作現場求和，終令漫星將抑壓心底多年的鬱結及情緒爆發出來！漫星先是聲大大不斷發爛渣，之後當聽到滿月問她是否嬲自己秘密報仇時，漫星開始逐漸激動：「我有資格嬲咩？你覺得我有資格嬲咩？」、「咁多年嚟我乜都冇做過，我呢個做家姐咁冇用、咁怕事！」自責完後又偽裝堅強、扮冷血假裝自己沒有受傷，漫星說：「我驚你連累我咋」、「全世界都覺得你先係最慘，其實我都好慘，你依家知啦，我呢個家姐就係咁衰架喇！」豈料滿月不但沒有怪責漫星，更落淚自責，漫星此時情緒再度大逆轉，由激動憤怒的落淚、轉為心痛無助的哽咽式落淚：「其實我好感恩，好感恩個天冇帶走埋你兩個，你報仇成功我真係好開心，但我唔知點面對阿爸阿媽，我真係面對唔到呀！」最後余氏兩姊妹落淚緊緊擁抱，場面感人。

坦言與親妹對戲「好有壓力」

楊卓娜好戲之處，除名副其實「淚如泉湧」，就連面部表情及聲線，更與對白及劇情走向配合得天衣無縫；委屈時，Lenna連聲音也倍覺哽咽淒涼、心痛時，Lenna五官會「揦埋一舊」，加上角色性格本身偏大情大性，令觀眾更易入戲。談到與親妹妹對戲、而且還是喊戲，Lenna坦言起初好有壓力：「因為我未試過同我個妹講對白，但原來又冇我想像中咁緊張，所有嘢都好自然。」

談到場口，Lenna感恩拍攝順利：「嗰場戲所有嘢都好自然、好衷心做到出嚟，所以一take就過咗去。其實由我拎起劇本睇嗰刻，我已經好投入、已經喊咗，每次只要我一諗嗰個對白，我就好想喊，even到依家都係；其實我已經唔係好記得啲對白，但個情緒仲喺我心入面，好touched到我，要touch咗自己、先可以touch觀眾。」Lenna又大方分享投入角色之道，基本都是功課要做足：「要明白角色嘅立場，畀好多充份嘅理由佢，如果唔係觀眾覺得有反駁嘅，就會投入唔到。」