黃子華爆文雋寫專欄焫著陳百祥 叻哥帶記者上商台要求隻揪？ 導火線係……

近日黃子華為電影《破地獄》四出宣傳，並現身電影人文雋嘅YouTube 節目。二人俱曾在商台工作，子華更提到多年前文雋同陳百祥有過節嘅黑歷史，甚至話阿叻要求「隻揪」！

作為當事人，文雋提到九十年代中阿叻因為主持遊戲節目《運財智叻星》成功入屋，人氣高企，更開咗七場紅館演唱會。文雋憶述當年喺報紙專欄以陳百祥嘅《我至叻》登上勁歌金榜一事為題材，Man哥表示當時「手多」寫咗句『如果呢個樂壇，連陳百祥嘅歌都可以上榜呢，咁我哋個樂壇……下刪500字。』，並指陳百祥當時睇完之後好嬲。

黃子華聽到後就問「下刪500字可以係讚美嘅字架？」，文雋話「係想有個留白畀大家」。殊不知，當年文雋喺商台主持深夜節目《成人知己》期間，阿叻突然同秀姑（黃杏秀），帶埋一兩個記者直闖直播室！「我唔記得係開咪前定開完咪，就喺𨋢口相遇，佢（阿叻）就立即開口鬧，『文雋你做咩咁寫？』。當時秀姑就同我講『叻哥真係好嬲呀！佢好嬲呀！』」。

文雋話理解陳百祥想當面對質，最後陳百祥同文雋講手唔成，但Man哥就相當無奈。「黃杏秀同我講時，我咪『哦！哦！哦！』，我有咩好講呀？只係一篇文章。」

有Facebook 專頁曾提及呢件事，仲話當年上過TVB《城市追擊》節目，阿叻更直闖商台直播室云云，而文雋就邊行邊耍冧。不過由於年代久遠，暫時仲未搵到呢集《城市追擊》片段求證。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！