「第一美胸」徐冬冬宣布同尹子維訂婚 多次離合終修成正果

曾被稱為「中國第一美胸」嘅內地索爆女星徐冬冬，尋日宣布同拍拖多時嘅男友尹子維訂婚。

徐冬冬於內地社交網正式宣布喜訊，出post手上鑽戒之外更貼上同未婚夫尹子維嘅合照。徐冬冬喺帖文表示已訂婚，但婚禮形式待定，又指「如果順利我們會在哈爾濱辦個流水席，接地氣熱鬧喜慶，到時請哈爾濱的網友們一起參加。洛杉磯的家人朋友會舉行簡單小型婚禮。香港和同事朋友家人們簡單聚會。」

因為一副35E震撼身材而成名嘅徐冬冬，同大佢15年、曾拍攝港片《特警新人類》嘅尹子維於2018年拍拖，甚至喺2019年4月傳出尹子維求婚成功，不過同年8月二人卻分手收場。之後徐冬冬同尹子維多次離離合合，2022年底尹子維更喺網上公開發文寫道「還是很喜歡冬冬啊」，仲一連串出post求復合，但徐冬冬當時落閘，承認之前二人一度復合，但當時表明「我和他的節奏早已是兩個世界的人」。有網民直接叫尹子維出動銀彈攻勢，買樓買車追返前度，而尹子維就自爆徐冬冬一早將佢送嘅車同樓退回。

去到舊年，徐冬冬同尹子維又復合嘅消息又再傳出，到去年8月佢地終於以一張拖手照正式公布復合。到早幾日情人節尹子維再次放閃，post出鑽戒仲tag埋徐冬冬，更寫上「聽說徐總喜歡這個品牌！我不是戀愛腦！情人節快樂！」，好大可能當時已經求婚成功。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！