「粗口港姐」梁允瑜IG大玩你問我答 霸氣回應被人包養問題：我鍾意自食其力

梁允瑜（Chloe）喺2021年參選港姐被封為「粗口港姐」，賽後Chloe鬧爆TVB，不過今年年初仲有機會簽約TVB做親生女兼獲安排拍劇。

最近Chloe喺IG潮玩匿名你問我答同網民互動，佢更逐一回答網民問題，部分網民嘅問題相當尖銳，問被「你係咪比人包？」時，梁允瑜直言話：「我都想^^畀人包仲使咁忙返工。Sorry我鍾意自食其力。」有人話「貪慕虛榮 入大台 選港姐 最後落選 冇得釣金龜 睇到都心涼」，梁允瑜就回答話：「睇你點定義貪慕虛榮 邊個唔想有錢有權力有地位 同埋sorry我冇諗過釣金龜 我靠自己好足夠 唔鍾意靠男人」。另外，仲仲有網民問「比你時光倒流，你仲會唔會拍粗口港姐條片？」，佢回應話「香港地邊個唔講粗口，我唔覺得有咩問題，嗰陣嘅我係咁就係咁，即使係而家嘅我都唔會話完全唔講粗口，都係嗰句啦，成年人識得適當時候講適當嘅嘢」

除此之外，網民問「覺得自己係女主角材料嗎？」、「點解會入tvb唔入ViuTV」、「有冇整容」及「單身？有男友？有老細包？」等問題之外，亦有唔少網民留言支持佢。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！