「TVB御用強姦犯」李天翔轉投ViuTV升呢做男二

由「認字特警」到「御用強姦犯」 嘅李天翔，佢曾接受網上媒體訪問時講過自己已經等咗20年，唔希望再等，佢想主動出擊，希望咁樣可以換取更大自由，有更多嘗試。喺2019年，佢選擇離巢，雖然曾因冇工開而感到迷惘，不過佢都有其他瓣數，例如做私人健身教練及經營寵物零食店。過往經常飾演閒角或奸角嘅李天翔，上年已經轉投ViuTV，更於新劇《冥冥之中》升呢做男二。

喺《ViuTV 2022》節目巡禮中，新劇《冥冥之中》係今年ViuTV嘅重頭劇之一，劇集搵嚟郭羨妮、劉心悠、柏天男、蘇志威及李天翔等人主演，劇集以科幻及穿越作為題材，講述一間以連鎖效應死亡事件嚟平衡人口數量嘅公司，而呢間公司嘅主理人就係郭羨妮。

現年45歲的李天翔1995年考入TVB藝員訓練班正式開始藝員生涯，入行後主持過兒童節目《閃電傳真機》和《至NET小人類》，當中喺《認字特警》入面扮演「認字唔認人」嘅「認字特警編號999」而深入民心。由2008年起，李天翔由「認字特警」一變成為TVB「御用強姦犯」，皆因佢經常飾演強姦犯角色，例如《金石良緣》、《鐵馬尋橋》及《張保仔》等等。另外，佢亦被多次安排飾演反派角色，例如《解決師》及《果欄中的江湖大嫂》等等，憑出眾演技加上凌厲眼神，成功令觀眾留下深刻印象。離開無綫後，李天翔曾試過兩個月冇工開，期間只係擔任過ViuTV節目《點相》一集嘉賓，所以令佢感到迷惘，仲一度諗過轉行，不過之後獲邀拍電影《金錢帝國：追虎擒龍》 ，令佢打消轉行念頭。ViuTV新劇《冥冥之中》喺上年已經完成拍攝，相信大家都會期待佢嘅演出。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！