雅虎香港新聞 【人到中年要能把壞日子過好】月入6萬育2兒40歲男被炒 為養家再拼搏：唔介意去快餐店做
人到中年突然被炒，突然失業始終係一大難關，要跨過絕唔容易。有位40歲嘅巴打，喺網上分享自己被炒之後嘅心情。並唔係要發放負能量，相反係淡然咁分享人生起伏，態度豁達，當中嘅正能量令唔少網民大受感動！
會考3分17歲開始打工 靠自己一步步打拼
巴打本身從事廣播工程，觸及電腦及媒體。佢話自己17歲出嚟做嘢，做咗23年，最後一份工就做咗11年，職位係「Solution & Tech Manager」。佢嘅人生從來都唔係一帆風順，讀書時會考只有3分，中五畢業後就開始投身「社會大學」。
把握機遇 迎來事業轉捩點
佢唔係一開始就從事專業，中學畢業後嘅第一份工係倉務員；之後佢機遇巧合下見過電腦中心嘅招聘啟事，就膽粗粗去試。佢唔介意朝10晚10、六天工作、只有4000蚊月薪，形容一年間學咗好多電腦嘢；佢後來又做過售貨員賣電腦，之後覺得自己仲年輕仲想學嘢，所以又讀咗個課程「轉跑道」，轉而從事設計行業。
佢做咗一年設計後，開始想做更多平面設計以外嘅工作，更想做嘅係網站相關工作；佢再讀電腦相關課程，之後入咗間新開嘅公司，正式入咗電腦行業。佢繼續爭取機會，進一步做同影片有關嘅工；其後更被招攬到一間美國公司做(即係佢最後做緊嘅公司)。
一個接一個工作挑戰 體會不同國家同事處事
喺呢間公司做咗11年，佢喺外國嘅日子好多，要面對不同國家嘅同事、客人，例如：美國、日本、韓國、東南亞各國等，挑戰一個接一個：外國人歧視、語言熟習問題、人事鬥爭、無間斷嘅麻煩電腦問題。對於呢一切，佢都沉著處理，更有深刻體會：「美國、歐洲係諗方法去解決問題；中港台、東南亞就係諗方法去防止問題。」
人工6萬被炒：公司只當員工係一堆數字
佢被炒之前大約6萬蚊月薪。回望過去，佢話一直都無計較過人工，入職時已係人工較低。佢自覺自己唔係專才，所以唔介意做豬頭骨、蝕底嘢，做到嘅都會做。佢嘅工作原則係唔擦鞋，唔會為啖氣，唔會為嘈而嘈。而今次被炒，佢形容人工「補足有突」，其實算「開心走」。
佢最唔捨得嘅，其實係一班同事、下屬。佢多年來見過唔少震盪，曾見過公司一次過炒一個部門，公司恆常地炒人，令佢意識到「公司只係當我哋(指員工)係一堆數字」。作為經理級嘅佢，曾經幫同事爭取花紅，因為覺得佢地嘅付出唔可以當無事。
巨浪襲來公司精簡架構 一組12人剩3人
巨浪最終都無可避免冚過嚟，巴打終於要走。佢嘅公司要精簡架構，之前已將資源逐步搬去菲律賓，其後更加想搬去印度，佢已算係最遲走果批員工。巴打不諱言，印度嘅人工比現時員工低三分二。佢原本果組就由全盛時期嘅12人，變成只有3人。
育2兒為養家願減人工 巴打：唔介意去麥當勞做
人到中年被炒，巴打無自怨自艾，只係想簡單休息兩個星期。對於未來，佢睇得好開，但有一樣嘢佢堅持，就係佢結咗婚、育有兩個小朋友需要養家，所以一定會搵嘢做。話雖如此，佢嘅心態好放得開，會試下搵返原本果行做，人工盡量爭取，但有減人工嘅心理準備；佢同時有諗過自己開公司創業；就算上述嘅嘢都唔成功，佢甚至唔介意去麥當勞做。佢話老婆原本係護士，不過已無做嘢5、6年，而佢唔希望老婆感到壓力而要再做返嘢。
唔少網民睇完都話叔叔巴打好成熟，好有經歷，更覺得做到佢嘅同事係幸福。而且巴打嘅經歷，更為一啲面對事業樽頸嘅網民指明咗方向。網民都祝福佢可以盡快搵到工，繼續拼搏，甚至係創業成功！的確，失業唔一定係絕路，都可以係一個新開始，推倒重來往往可以創新天，唔試過又點知唔得呢，係咪？
相關字：
40歲 中年 失業 被炒 正能量 花紅 創業
