【以美食開啟第二人生】天后新開無框架Fusion菜館 招牌鮮麻花椒拉麵

2020年7月，有五個年輕人以Pop-up形式開啟咗佢哋嘅第二人生；嚟到今年9月，佢哋將自己嘅心思同精神投放喺天后呢間新開嘅多國菜餐廳裡面。打開Menu會見到糅合中、西、日，甚至係星馬特色嘅菜式，可以話佢哋無框框自由發揮，亦可以話係融會貫通嘅Fusion菜，但原來一開始係為咗「自肥」？

五位負責人Karry、Lico、Fanny、牛𦟌、安仔於古月認識，一齊開店將佢哋想同大家分享嘅味道呈現出嚟

t2P呢個餐廳名有「The Second Phase」第二人生，同「Time to Play」及時行樂嘅雙重意思。由喺北角古月認識嘅幾位年輕人創立，之前喺古月開每月只營業一日嘅Pop-up限定店，暫休後經過籌備，最近搬到天后興發街重新開始佢哋嘅「第二人生」。

問到設計菜單嘅靈感點嚟，負責人之一嘅Karry非常誠實指因為佢哋幾個都非常「為食」，特別係麻辣，而當中一位負責人係拉麵師傅，佢哋就諗有無可能將麻辣呢個元素放喺日式拉麵當中。試過唔同配方後，最後成功煮出而家呢個充滿麻香而唔會太辣嘅花椒拉麵！

豬肉有兩款，一款係先慢煮再火灸嘅豚五花叉燒，慢煮令瘦肉部分嫩滑唔柴，而火灸就可以帶出油脂香。另一款係豚面肉，肉質爽脆。自家味玉非常入味，蛋黃呈膏狀、香濃軟滑。

湯底以雞、蔬菜、魚仔等熬製，味道清新鮮甜，更加突出花椒嘅麻勁，同帶檸檬味嘅獨特香氣，醒胃過癮。麵條就選用幼直麵，掛湯程度啱啱好。值得一提佢哋嘅拉麵、沾麵同意太麵用各自用嘅麵都唔同，值得一試坊間少見嘅意太麵，同樣因為負責人之一特別鍾意日本太麵，因而發揮創意做出唔同口味，充滿新鮮感。

鮮味十足嘅湯泡飯，茶壺裡面係以高湯底加上自家燒汁調配而成嘅上湯。獨樹一幟棄茶漬飯常用嘅熱茶而選擇燒汁，係幾位負責人自己試出嚟嘅配方。皆因新店著重融合同變化，所以無任何規限或者傳統包袱，可以天馬行空咁去創作出屬於佢哋自己嘅味道。

湯頭有鰹魚嘅鮮甜同微微焦香，配飯食的確一流。燒豚五花切片後更容易食出豬皮爽彈、肥肉香軟、瘦肉軟腍嘅三重口感，特別係肥肉軟到幾乎入口即溶，滿嘴油香。

同樣由於幾位負責人鍾意麻辣而「自肥」設計得出嘅菜式，亦係Pop-up第一款推出嘅小食。日式炸雞外層酥脆，雞肉嫩滑多汁。紅色嘅味粉係將多款香料同辣椒打碎而成，再保留宮保料理嘅元素加入腰果同肉桂葉，香口得嚟辣味會慢慢滲出！

之前以Pop-up店形式經營嘅時候不時都有驚喜嘅隱藏菜單，嚟到天后新店同樣會有Off Menu菜式，鍾意嘗新嘅朋友不妨問問店員有咩推介。今次採訪就有呢份牛肉腸粉，通常講到牛肉腸粉大家都會諗起港式飲茶以腸粉包住牛肉餡嘅形式，佢哋就做成反捲：用美國牛板腱肉包住粉皮！餡料仲有芫荽、乾蔥等，以黃芥末醬點綴再淋上酸汁，惹味開胃。

窩夫以日本雞蛋製作，口感似軟身麻糬幾Q彈。上面嘅Tiramisu忌廉充滿朱古力同咖啡香，味道濃郁，不過食嘅時候小心唔好畀可可粉嗆到呀。

以Karry同安仔兩位負責人為名嘅自家釀製薑汁檸檬汽水，天然氣泡嚟自加入有機蔗糖後發酵，有啲似今年興起嘅康普茶。由Karry同安仔反覆嘗試唔同發酵時間同溫度，先得出而家既有薑嘅辛辣、亦有檸檬嘅酸香去中和辣度，同時氣泡充足嘅理想狀態，所以飲品名亦有Carry On不斷努力嘅意思啊！

t2P
地址：天后興發街100號

文：Cathy.H
相、片：Wilfred Chui