【共享單車末日】Ketch'Up Bike預告三月結業 逾千單車擬變月租

繼去年中Gobee.bike清盤、近日ofo小黃車在中國爆出千萬人要求退款，共享單車已成「火燒連環船」。在港有逾千輛，經營近一年的共享單車Ketch’Up Bike亦宣佈，料在3月正式結束現有共享單車生意。

Ketch’Up Bike首席科技總監鄧熾承博士近日就向《蘋果》表示，早前Gobee.bike事件後，與業界開會，並發出了經營指引，但公司計算過後成本需額外增加近百萬，惟有決定離場：「指引有規範我哋業界要遵守，令到成本上升咗好多。」他舉例指，「港島唔放得、九龍亦即將唔放得、新界亦都好多地方唔得。」

他續指，如單車發現問題要限定時間內處理、如停泊到違規地點更要即時處理，「就算係我哋，都必清楚得晒邊啲地方唔泊得。」他解釋：「如果要加強個App系統，基本上同做一個新無分別；同埋滿足晒成個規範，人手起碼要加1倍，計過成本差唔多增加一百萬，收支係平衡唔到。」

鄧博士認同政府應加強對共享單車的規管：「其實大家都想做好件事，本來目標都非常好，令市民知道共享單車唔係擾民，但政府有佢嘅位置，我哋都有自己諗法，到最後夾唔到。」

公司一向以「真共享」為賣點，早前聯合創辦人鄒健宏(Kenneth)接受傳媒訪問時曾介紹用家可以1,600元購買單車，之後可將單車租予其他人賺取佣金。他提到，維修費、搬運費亦遠超多初預算：「搬單車番去多人租嘅地方，（成本）比預期為高，而每一架單車真係可以賺到錢嘅亦比預期中少。」而當中被破壞的單車亦不計其數，「要晨早就去維修」，導致員工工時不斷增加，坦言成本比傳統單車店高：「每多一部車喺街，用戶隨便放同埋破壞嘅機會就會高咗，仲要租貨車去廠維修，繼續發展落去就要加幾倍人手。」

鄒健宏指會開始準備收回單車，「之前同我哋買咗車嘅車主就會退還，有部份單車就會同中學合作，每間送5至10架，提高佢哋對運動興趣。」他強調沒有因結束共享單車而裁員：「我哋每一分每一毫都使得好清楚，現時全職嘅同事都係得五位，都會繼續留喺公司，主要係兼職，基本上都無得裁。」他亦透露Ketch’Up Bike會轉型，「我哋就設計咗個藍牙計算器，可以裝喺任何單車，記錄用戶使用單車嘅情況，從中可以用比賽形式，可能頭30名就有獎賞。」而有單主的市民亦只需透過安裝計算器，便能加入出租計劃，直接將單車租予用家，亦打算將部份單車以每月200元放租。

問到共享單車會不會在港消失，鄧博士就指：「我又覺得未必，個模式知道太方便係唔得嘅話，有咩方法係做好啲，共享單車應該有更加理想發展。」最後記者問及如沒有政府干預，公司或能夠繼續經營，會否覺得可惜。鄧博士答：「其實唔可以咁講…你唔做第一個，你永遠唔可以刺激到後面嘅…政府從來未就共享經濟做咁多嘢，我覺得係一件好事。」

記者：梁延宇