【又孖住外遊】陳庭欣同有米男友日本行街 彩豐行老闆楊振源變阿四

10年港姐冠軍陳庭欣（Toby），舊年6月被爆做小三，喺劉依靜（Ruby）手中硬撬身家逾億嘅彩豐行老闆楊振源（Benny），而且仲疑似為咗新歡而狠撇舊愛Warren。

陳庭欣同楊振源拍拖以嚟不時甜蜜外遊，好似舊年佢哋去咗希臘、杜拜同威尼斯，原來佢同男友近日又去咗日本旅行，仲畀《蘋果》一位男讀者撞見佢同男友喺大阪心齋橋行街。

呢位讀者噚日同《蘋果》報料話：「我同女友今個月14號中午時份喺大阪心齋橋撞見佢哋，係我女友見到嘅，我自己就一向唔係好留意佢。」讀者拍咗段片，睇片見到陳庭欣同楊振源着住黑色羽絨，兩個人一前一後，陳庭欣邊行邊皺晒眉頭撳電話，而楊振源就兩隻手攞住一袋二袋嘅戰利品，十足十做阿四咁。

其實陳庭欣呢幾日都有放滑雪嘅相同片喺Instagram，仲tag埋自己喺福井縣嘅勝山滑雪場滑雪添，陳庭欣仲留言話：「今年嘅ski trip正好多呀！」好明顯玩得相當開心啦。

陳庭欣今日回覆傳媒：「早晨！旅行開心，我哋同其他同行朋友都開心！唯一少少唔開心嘅係被偷拍了。其實去旅行冇咩特別，人人都會去旅行，冇新聞價值的。希望劉生將心比己一下，明白學懂尊重他人，謝謝！」