【唱情歌冧太太】被指唔識做人爸爸 林奕匡懶理勸籲照計劃生B

林奕匡（Phil）喺九展舉行演唱會，噚晚去到尾場，Super Girls成員Aka繼續做表演嘉賓，佢哋合唱《明愛暗戀補習社》仲夾埋舞蹈，唱完歌之後，Aka話：「噚日忙記咗講，我能夠做嘉賓係好大嘅榮幸。」Phil就對住Aka話：「你哋跳舞好叻，我哋友誼好好，排呢隻歌學跳舞，我唔係一齊學，係提早7日學，跳舞老師一早教我，因為驚我跟唔上進度，點知你一嚟就爬過我頭，我想同你講，之後你教我跳舞，我會跟你。」Aka回應話：「如果係咁，你教我吹啦！」點知Aka一講完，觀眾即刻大笑。

另一對嘉賓係DJ蘇耀宗(細So)、創作歌手陳詠謙，二人台上chit chat，爆平時有同Phil一齊做運動，有次做做下，聽到啲「嗄嗄」聲，跟住有人嗌：「baby.」，佢哋當然係望下做乜事，原來係Phil同太太Rikko互相鼓勵緊，細So笑話：「我哋兩個都係做人老竇，喺呢度想同你講，唔好做老竇住，你唔會識得做，見你同太太成日周團去旅行，做人老竇之後，就冇咗二人世界！」陳詠謙接住話：「生仔之後好多嘢要兼顧，有次喺屋企突然有靈感想作歌，太太就話個B瀨屎快啲換片，為咗家庭和睦，我換咗片至去寫歌。」而演唱會尾聲時，Phil走到台邊對住太太唱《咫尺》，仲講明首歌係送畀太太一人獨有。

完騷之後，Phil接受訪問，講到下一站會唔會想喺紅館開騷?佢話：「唔知，紅館永遠係其中一個目標，但唔敢諗太多，前幾年經歷過咁多磨練，唔會追一個時間為目標，總之將所有事做到最好，唔期望太多，自然冇失望。其實每個演唱會都唔易做，觀眾係真金白銀買飛睇，要做到好大誠意畀大家睇，今次騷後目標係學跳舞。」問到生B計劃?佢話：「係有，不過太太好忙，都要調理好身體先。」

另外，問到Aka想叫Phil教吹乜?佢笑話；「想叫佢教我吹色士風，講得快咗。」