【多圖】柳應廷演唱會｜Yahoo 娛樂圈直擊 柳應廷Jer 個唱尾場獲吳林峰贈初心哽咽 感謝家人無條件支持高呼：我大個仔啦！

【Yahoo 娛樂圈直擊報道】MIRROR 首個以個人身分開演唱會的成員柳應廷（Jer），周一（10 日）在會展舉行的一連 4 場《JER LAU “ACROSS THE UNIVERSE" IN MY SIGHT SOLO CONCERT 2023》來到尾場。繼早前先後邀請陳蕾、林宥嘉等重量級嘉賓後，Jer 在尾場表示，特別想介紹自己十分欣賞的音樂人雷同二友、吳林峰予歌迷認識，其中吳林峰與 Jer 識於微時，都是 Busker 出身，更大爆當年相認趣事，原來各自都欣賞過對方 busking 但不自知，十分搞笑。

吳林峰更即席把自己的「老婆」— 人生第一支儲錢買的結他贈予 Jer，半開玩笑說，「我今晚任務就係整喊你！」又感性謂，「你成日話我好努力，其實你都係好努力好努力嘅人。呢支結他太耐，其實啲音要執嘅，但因為係第一支，我想將佢保持在當初的狀態。一直擺喺屋企，它的作用是，每日我返去寫歌，迷失、諗唔到嘢，好嬲，每次想放棄嘅時候，就會望一望支結他，話俾自己知，『嗰陣都捱得過，依家都一定冇問題』，同埋話畀我知呢個係我嘅初心。送俾你嘅原因係，因為你都行咗一段路，來到呢個台上，想話你知，除了多謝身邊好多人之外，你更要多謝自己，仍記住個初心。」Jer 聽罷一番話即時眼泛淚光。

Jer 亦有演唱吳林峰的〈捱麵包的人〉，他表示邀請嘉賓時，第一個想起就是吳林峰，形容對方是圈中其中一位好朋友，可能因為大家都是 busker 出身，「好多嘢唔使講出口佢都會明白」，Jer 亦大讚對方是很努力、很厲害的唱作人，「好想透過這機會介紹香港好犀利的創作人畀大家。」

演唱會尾場，Jer 特別表示增設了一個環節，就是介紹自己十分欣賞的音樂人，除了吳林峰，還有為他今次個唱擔任和音的雷同二友（謝芊彤、謝芊蕾），更邀請二人在台上即席演唱她們的新歌〈路仍長〉。Jer 形容，台上每一位都是「好閃的星星」，又寄語大家，「無論你心裡面有咩夢想，喜歡做甚麼，不同崗位都可發光發亮，都是一粒星星。」

演唱會尾場於晚上 8 時 30 分開始，同樣以〈從零開始的新世界〉開場，佢提到呢首歌代表住嘅正正係佢腦入面「演唱會開場嘅畫面」，所以先會將呢首歌作為演唱會嘅第一首歌呈現俾觀眾，之後Jer接連演繹多首個人作品，例如係「物語三部曲」及「虐心三部曲」等等嘅一系列作品。

Jer 亦有在 encore 環節邀請樂隊 The Hertz，合作對方的〈天堂 100 %〉和〈千世書〉，主音 Herman 在台上感謝 Jer 給他們在如此大的場地表演的機會，又搞笑說自己鍾意 Jer 的樣貌和舞技，隨後正色謂，「Jer 真係一個好溫暖的人，佢值得更加更加多的（支持），呢度係香港，但佢會搵我一齊做〈從零開始的新世界〉，咁怪雞，但佢堅持做自己鍾意的音樂人。」

來到尾場，除咗「柳柳粉」唔捨得之外，Jer 都好唔捨得個舞台同一班支持佢嘅Fans，所以喺演唱完最後一首歌《人類群星閃耀時》之後2度重返舞台Encore，演唱《P.S. I Love U》、《陀飛輪》同《樂壇已死》幾首意義重大嘅歌，佢仲多謝有到場支持自己嘅屋企人，一直無條件支持佢做任何嘢，亦都同大家講：「經過呢5年，我大個仔啦」。

去到演唱會嘅最後，Jer選擇以《後台》作結，配合一條紀錄成個演唱會嘅每一刻，多謝台前幕後每一個幫佢完成呢個演唱會嘅人，亦都多謝支持佢嘅Fans，更加承諾嚟緊會開多啲Show回饋Fans，揚言會為Fans唱到80歲！

MIRROR 6 名成員舉行個人演唱會，繼打頭陣嘅 Jer 之後，會係 Anson Lo（盧瀚霆）喺 7 月 23 - 26 日、姜濤喺 8 月 2 - 5 日同 Edan（呂爵安）喺 8 月 26 - 27 日，三名成員都會喺亞博開騷。至於 AK（江𤒹生） 同 Ian（陳卓賢） 嘅 Solo Concert 會喺下年夏天舉行，尚未公布詳情。

相關報道：【多圖】柳應廷演唱會｜Yahoo 娛樂圈直擊 Jer 個唱 狂人再現高水準飆高音 重唱多首《造星》歌曲見證蛻變