雅虎香港新聞 【多圖】柳應廷演唱會｜Yahoo 娛樂圈直擊 Jer 個唱 狂人再現高水準飆高音 重唱多首《造星》歌曲見證蛻變
【Yahoo 娛樂圈直擊報道】「我被遺落在寬廣的銀河，面前繁星多不勝數」，「繁星怎麼要發光直到天曉，真空幻化光線隨處閃耀」。MIRROR 成員 Jer（柳應廷）自 2020 年單飛出歌後，先後推出「物語系列」、「重生系列」、「虐心系列」等多首扣人心弦歌曲，在旋律中創造出新世界，探討宇宙及人生觀。多年來一眾「柳柳粉」渴望 Jer 開個唱，早前 Makerville 公布 MIRROR 6 子將舉行個人演唱會，千呼萬喚今晚（7日）終於由 Jer 打頭陣，喺香港會議展覽中心展開一連四晚演出！
作為第一個 MIRROR 成員舉行個唱，Jer 嘅粉絲（柳柳粉）都喺會場外為偶像打造一個個大型應援物，除咗幫偶像應援，一眾 Fans 都可以打卡留念，紀錄呢個難忘嘅夜晚。
Jer 今晚以《從零開始的新世界》作為演唱會開場曲，之後緊接唱《MM7》，伴隨住強勁節拍同炫麗多變燈光效果，「舞王 Jer 」亦跳埋一份騷舞技！佢唱完兩首開場歌曲之後話：「想睇我跳舞嗰啲可以走先！哈哈！講笑」，「頭先嗰 Part 我覺得已經係勁歌熱舞！」引來一眾觀眾爆笑。
之後，Jer 演唱多首熱門歌，包括「物語三部曲」、《砂之器》、《狂人日記》同新歌《JM單身9》等。唱《狂人》時一如以往將場內氣氛推到最高，Jer 亦不負眾望飆高音演繹靚聲，而台下觀眾則揮動「狂人再現」手幅回應。
演繹「虐心三部曲」感觸 Jer 為已故好友獻唱
喺唱到「虐心三部曲」嘅時候，Jer 唱完《坐看雲起時》後亦分享感言「其實對我嚟講宇宙嘅旅程係會有喜有悲，其實一個人生裏面我覺得係要有甜酸苦辣，你要經歷完一啲事情之後你先會成長，有呢個經驗你先會有感受。我好多謝頭先個 Part 嘅歌，令我喺過往過去裏面對於人生有好多感受，特別係啱啱最後嗰首歌，我記得喺錄到 Section 5-6 我都係仲未搵到個感覺，因為對我嚟講個宇宙實在太大，我可以係啲乜嘢？直至到我遇到有個朋友嘅一件事，我希望可以送頭先呢個環節俾天上嘅佢，希望佢會睇到我真係有喺到代佢唱歌俾佢老公聽。」
偕頭場嘉賓陳蕾合唱《凡星》
除咗演唱自己嘅歌之外，Jer今次亦都演唱唔少其他人嘅歌，包括師妹 COLLAR 嘅《The Bright Side》及陳奕迅嘅《致明日的舞》。至於嘉賓方面，頭場演唱會就請嚟陳蕾（Panther），二人以一身純白色「小王子」、「月之女神」造型登場，合唱《凡星》。
Encore 環節重溫多首《造星》歌曲
喺演唱會嘅尾聲，Jer 以《人類群星閃耀時》一曲作結，配合一組 Vocalist 合唱，充分演繹《群星》壯闊澎拜嘅旋律，唱完之後 Jer 就離開舞台。一眾 Fans 當然唔會咁快俾演唱會完結，紛紛要求 Encore，甚至有 Fans 大叫「柳應廷我愛你！我等唔切啦！」Jer 亦都不負眾望喺 Fans 歡呼聲中重返舞台，更一連演唱 4 首歌，包括《P.S. I Love You》、《陀飛輪》、《眼色》同《樂壇已死》。
Jer 更透露《P.S. I Love You》係佢學結他第一首學識嘅歌，而《陀飛輪》就係佢喺《造星》被淘汰唱嘅歌，所以別具意義，希望喺演唱會再次演繹。
喺Encore環節佢更多謝一眾台前幕後嘅功臣，特別係魯生：「佢話喺十年前做阿臣（Eason）演唱會嘅時候曾經幻想過有一刻可以自己做一個星喺台上面唱到一個 Theme 嘅演唱會，佢話十年之後我係第一個，多謝你啊魯生」而伴隨住 Fans 嘅尖叫歡呼，Jer柳應廷嘅第一場個人演唱會亦都完滿落幕。
嘉賓
陳蕾
歌單
1. 《從零開始的新世界》
2. 《MM7》
3. 《水刑物語》
4. 《迴光物語》
5. 《風靈物語》
6. 《砂之器》
7. 《狂人日記》
8. 《JM單身9》
9. 《漂流號》（原唱：The Hertz)
10. 《離別的規矩》
11. 《自毀的程序》
12. 《坐看雲起時》
13. 《繼續繼續》（原唱：陳健安）
14. 《捱麵包的人》（原唱：吳林峰）
15. 《凡星》（原唱：陳蕾）
16. 《The Bright Side》 ( 原唱 : COLLAR )
17. 《致明日的舞》(原唱：陳奕迅）
18. 《人類群星閃耀時》
————— Encore—————
19. 《P.S. I Love You》 (原唱 : Supper Moment )
20. 《陀飛輪》(原唱：陳奕迅）
21. 《眼色》(原唱：林宥嘉）
22. 《樂壇已死》（原唱：吳林峰）
Jer 與小克、王雙駿（Carl叔叔）在過去 2020 至 2022 年間合作製作了 10 首歌，形成一幅大拼圖。
「物語三部曲」（2020年）：《水刑物語》、《迴光物語》、《風靈物語》
「重生三部曲」（2021年）：《狂人日記》、《砂之器》、《人類群星閃耀時》
「虐心三部曲」（2022年）：《離別的規矩》、《自毀的程序》、《坐看雲起時》
《FWD 富衛保險10周年 x HKT 呈獻：JER LAU “ACROSS THE UNIVERSE” IN MY SIGHT SOLO CONCERT 2023》
日期：
【MIRO 場】2023 年 7 月 7 日
【公眾場】 2023 年 7 月 8 - 9 日
【加開一場 MIRO 場】2023 年 7 月 10 日
時間：8：15 pm
地點：香港會議展覽中心 HALL 5BC
票價：$1,080 / $880 / $580
主辦及經理人公司：MakerVille
協辦：MOOV
冠名贊助：FWD富衛保險10周年 x HKT
大會指定虛擬銀行：Mox
四維折射：叱咤903
MIRROR 6 名成員舉行個人演唱會，繼打頭陣嘅 Jer 之後，會係 Anson Lo（盧瀚霆）喺 7 月 23 - 26 日、姜濤喺 8 月 2 - 5 日同 Edan（呂爵安）喺 8 月 26 - 27 日，三名成員都會喺亞博開騷。至於 AK（江𤒹生） 同 Ian（陳卓賢） 嘅 Solo Concert 會喺下年夏天舉行，尚未公布詳情。
