【好想做藝人】轉做文員保生計 假AV女麥紫莉減磅蒲頭

杜宇航有份主演嘅《功夫聯盟》噚晚喺銅鑼灣舉行首映，一班性感女支持撐場，包括湯沛宜、麥紫莉、艾美琦同契媽黃夏蕙。

曾經虛報係AV女嘅麥紫莉噚晚性感現身，身形明顯清減不少，谷胸露腰出擊，減肥後巨胸都冇縮水。 麥紫莉自被踢爆係假AV女之後就轉做貿易文職維持生計，負責打單出文件，佢話：「一星期返兩三日工，有時間都會出席首映同其他活動，噚日放假，不過比起之前都唔太性感啫。」又透露做文職都幾開心，終於唔使受矚目，又獲得同事支持，老闆又冇干預佢私人工作。

麥紫莉有意投身娛樂圈做全職藝人，已做好心理準備，更用咗三至四個月時間專登減磅，瘦咗三十幾磅，佢否認容易肥又大食：「以前我好瘦，但經過一段時間冇節制食嘢，唔小心就變咗以前咁肥身型，但現時未到最fit時候，之前最fit係52kg，依家55至57kg，想追返以前目標，但有啲難度，腰同pat pat都有啲橙皮紋出現。」

稍後麥紫莉會拍攝一個飲食節目，仲會出whatsapp sticker，月中更會出席一個日本AV女活動，屆時真係偽AV踫上真AV，麥紫莉之前又話後悔會為自己洗底，但噚晚又轉口風話：「有啲嘢唔可以避免，唔出席都有人記得你，面對好過逃避。」