【得唔到咪恨囉】成功冧掂古天樂跳舞 劉偉強爆:初時都有啲猶豫
古天樂輕輕鬆鬆就殺入叱咤樂壇「我最喜愛的男歌手」最後五強,大家都想集氣推古仔上頒獎台,無非都係想聽佢唱歌跳舞,呢part暫時唔知有冇得睇,不過古仔為劉偉強導演新片《武林怪獸》就演咗場跳舞戲。劉偉強接受訪問坦言,當初真係以為古仔唔肯做,但都膽粗粗開聲叫古仔同大陸女演員郭碧婷跳舞,而古仔初時都有啲猶豫,第一個反應係:「吓!你要我跳舞?」不過經過一輪游說之後,古仔最終都點頭答應。
劉偉強仲話其實排舞難唔到古仔,好快就同郭碧婷夾得到。而拍攝嘅背景音樂就用周潤發演嘅《笑傲江湖》主題曲,好有港式情懷,拍得好過癮,出嚟嘅效果亦好有驚喜。
o氹到古仔跳舞全靠劉偉強嘅努力,古仔就讚導演好專業:「劇本掌握好又熟手,拍得好有效率,而大部份都係廠景,覺得好似返去電視台拍劇咁。」