MIRROR 6月fans見面會 12子各自做一場 鏡粉鬧「見齊全團咪要成萬蚊？」

MIRROR成立官方fan club之後，似乎每次舉辦活動都會惹來fans 微言。尋日fan club宣布將於6月7－10日舉行今年首次MIRROR成員與鏡粉見面活動，地點係行將拆卸、MIRROR舉行首個個唱嘅STAR HALL。而今次聚會會將12子「分拆上市」，每位成員各自舉行一場見面會。至於聚會內容，除咗有30分鐘表演同互動環節，MIRROR成員仲會為fans送上御守及祝福，而且仲會有團體合照環節。至於票價就會劃一係780蚊。

對於安排各位MIRROR成員每人主導一場聚會嘅安排各有意見，有fans認為要見晒成隊MIRROR即係＄780 x 12 ＝ ＄9360蚊，炮轟MIRROR經理人公司MakerVille「搶錢」。而且根據官方宣傳，各成員喺聚會上有「有30分鐘表演同互動環節」，有fans質疑見面會實際見到12子嘅時間太短。有留言認為唔少fans支持MIRROR全隊人先至加入fan club，但結果而家fans聚會拆開晒，變相係官方帶頭搞分化。有fans講笑話，計返條數年初嘅MIRROR演唱會其實好抵睇，最平飛只需$680蚊就可以睇晒全隊MIRROR 3個鐘嘅演出。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！