【必睇】17歲姜濤主演微電影網上翻hit 同而家個樣大不同

唔少藝人成名後，都會被人搵返以前拍過嘅作品。出道2年幾嘅人氣王姜濤都唔例外，最近有網民拎返姜B 17歲時參演嘅微電影《1線之差》出嚟開心share。

《1線之差》係姜濤當年就讀青年學院(邱子文)嘅時候參演，作品參加反吸毒短片比賽仲得到獎。片中姜濤飾演失戀青年，為咗逃避分手回憶而選擇濫藥。片段唔長，但係姜B要演繹拍拖時甜蜜、失戀嘅崩潰同埋吸毒後魂遊太虛嘅反應，以未入行嘅業餘演員計算唔錯。

但係最值得睇嘅都係當年17歲嘅姜B，同而家外表大有出入，尤其是浮腫嘅雙眼！姜濤仲參加緊《全民造星》嘅時候，有人拎呢條片指控佢整容，姜B當時向傳媒否認，仲話自己當時減緊肥有水腫，而且本身內雙眼皮，係靠貼雙眼皮膠紙一段時間先至變成而家咁樣。當時有記者問姜濤會唔會割雙眼皮，佢就話「未割呀」，又搵同場嘅花姐同Anson Kong check佢有冇整過個鼻同下巴。

咁睇落當時姜B又未收晒身嘅，你地覺得同而家比爭幾遠？去片！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！