【我的置業故事】沽深圳樓賺兩球返港買樓 港人：大灣區非遍地黃金

大灣區前景被捧上天，十二年前早着先機在深圳以50多萬元買樓的陳生，反而覺得「吹到咁係有啲問題」，3年前覺得內地樓市見頂，「再升嘅話差唔多到香港嘅樓價」，覺得深圳樓貴過香港樓是無可能，於是賣掉福田一間兩房單位賺200多萬元，套現後轉投港樓懷抱，一口氣購入2個屯門豐連單位作長線收租用途，今趟買樓有別從前，「當年係大陸買樓嘅風險係而家香港買樓嘅兩倍！」

2007年他和母親合共有50萬港元現金，當時在香港是有能力買樓，「但就算買到，筆錢都係夠做首期囉，仲要供呢。當時環境無咁好，唔想咁大壓力，有少少餘錢，朋友介紹就去國內睇。當時覺得深圳近香港，又開始發展，發展落去可能幾級跳，希望賺取呢筆利潤，睇下有無機會返來投資。」

他深明隔山買牛風險高，「嗯，大陸樓感觀上可能惡劣啲，買咗後隨時可能無啦啦過一段時間冧咗！但當時我唔係買樓花，係買現樓」，最終以50多萬元在福田區買入1個面積約500方呎的二手兩房單位。

後來單位附近地鐵通車，樓價升幅以倍計。根據深圳中原地產數據，2007年年底深圳整體二手住宅物業平均呎價約1,250元，到2016年已升穿5,700元水平，升幅約3.6倍。2016年陳生認為深圳樓市見頂，遂將福田物業沽出，套現200多萬元。表面上賺錢，內心卻一直驚，「揸住大陸樓係淆底㗎，都係香港熟悉啲。坦白講，係賭一次㗎咋，唔係次次都贏。好彩賭贏咗，不如將資金搬返來香港。你有少少資金，都唔想博咁大，而有一筆資金係度，就無雄心壯志再去博。」

賣掉大陸樓那年大灣區概念已經出台，「大陸政策唔熟，睇幾單新聞，大陸話收你就收你，係推冧你（間屋）就推冧你。依家大灣區吹得好勁，其實睇番入面政策都唔喺好完善，睇返過去啲例子，話大灣區有個乜園，過咗無耐被政府取締咗，整個計劃推倒，幾億就無咗。嘩！真係有啲風險㗎喎，唔係真喺好似想像中周街都係黃金俾你執。」

班資回香港，碰巧南豐推出屯門新盤豐連，首批折實均價8,826元，首批138伙當中半過數售價低於300萬元。當時此盤一出，「其他地方只能買個廁所，但呢度可以買到大少少的單位。」他不諱言，當時夠資金一次過付款購入豐連1個單位，但低息環境下，何不善用按揭這個槓桿。最終將深圳炒樓連本帶利將近300萬元，拆開2份，再加近年儲落數十萬元，一口氣購入豐連2個單位，分別是1房單位（290萬元）、2房單位（480萬元），2個單位均借6成按揭，首期共約300萬元，月供約1.8萬元。

他認為，今次一博比當年大陸買樓較安全，「當年喺大陸買樓嘅風險喺而家香港買樓嘅兩倍！」目前他持有2個單位，1房單位已租出，因租客願意一次過支付全年租金，月租為1.05萬元，回報率4.3厘。另一個2房單位，月租1.5萬元，有3.8厘回報。

過去3年，屯門新盤價拾級而上，去年中資萬科以低市價推出新盤上源，同區樓價一度震盪，他說：「你唔知聽日會唔會冧市，唔知道聽日升得好癲，定跌得好癲，你唔知㗎喎。你而家有能力，可以買到嘅，咪買囉！同時我唔等住呢筆錢開飯。而家某啲地段可能跌返，但我無大感覺，我長線投資，唔係炒樓，又無用呼吸plan，同當年返大陸博呢筆資金唔同，個時博第一桶金，而家當長線投資，慢慢每個月有少少利潤，唔錯嘅！」

記者：陳家雄
攝影：何耀勤