【收咪騷炒飛嚴重】黃子華唔同意行實名制 憂侵犯私隱權

黃子華今年7月喺紅館開《金盆o浪口》棟篤笑，一早明言會喺呢次棟篤笑後收咪，令炒飛情況超乎想像。之後子華仲拍片，呼籲支持者唔好買黃牛，寧願見到空凳都唔想人炒飛，同時，佢亦呼籲政府研究措施打擊黃牛。民政事務局上月向立法會提交文件，正研究透過立法及行政措施打擊黃牛活動。

子華今日喺九龍塘出席「高錕慈善基金」活動，提到早前民政事務局交考慮以修例同行政措施打擊「炒黃牛」，包括建議減少內部認購比率、以實名制購票，以及將紅館、伊館等熱門政府場地，納入《公眾娛樂場所條例》，如日後炒賣紅館門票，將會觸犯法律。

子華今日回應指唔同意實名制：「我個人唔同意實名制，因為係侵犯私隱權，但我同意要檢討遊戲場所嘅條例，因為嗰條條例太過寬鬆，點解准炒樓炒iPhone，唔准炒飛呢，我答唔到大家，要適當地重罰，唔通炒黃牛要笞刑咩，要做一個夠阻嚇性，令大家知道係要付出代價。」

另外，楊盼盼噚晚喺《歡樂滿東華》率領一眾人表演空中繩索，當中有陳曉華份，佢話咁多次綵排都係失手，好彩到正式表演就成功，所以佢表示完成後，都忍唔住喊，佢又指楊盼盼雖然要求嚴謹，但就好似媽媽咁照顧佢哋。