【星Easy】 杜德偉(上)：兒子喚醒對亡父記憶 當爸後更想念杜爸爸

56歲的杜德偉總是說自己長不大，心裡永遠住了個小孩子。直到六年前浪子終於也找到歸宿，結了婚，還做了爸爸。兒子Alex Junior(AJ)這個月剛滿兩歲大，杜爸爸說再忙也要加緊做人，目標是給AJ再添兩個弟弟或妹妹：「第一次做爸爸感覺好夢幻，一切來得太快，我真係好想再經歷多一次！」

思念突然來襲 想起已故的父親
做了爸爸以後，終於知道那些別人口中難能可貴的父子時光是甚麼。和AJ碰拳的時候、洗澡的時候、在床上打打鬧鬧的時候，杜德偉沒有想到會觸動了自己成長的回憶，有一次想起已逝的杜爸爸，眼淚掉個不停：「人記憶好得意，好多嘢會石沉大海，我冇諗過喺自己做爸爸之後，因為個仔，觸動好多我以為自己忘記。例如有一次喺我剃緊鬚嘅時候，AJ好奇地行入嚟睇，於是我將個電鬚刨擺佢耳邊俾佢聽，突然間醒起細個陣，爸爸對我都做過同一樣嘅動作…..我記得爸爸過身時，有位長輩話過雖然佢離開，但係爸爸一點一滴會漸漸回到我身邊，甚至進入我身體成為我一部分，嗰一刻我攬住個仔喊，而且好感激太太令我有機會做爸爸，俾我感受到生命延續的奇妙！」

一代傳一代 是杜爸爸的幽默感
七年前杜爸爸在台灣屏東去世，最後的日子杜德偉一直陪在身邊。自己做了杜爸爸以後，杜德偉說小時候爸爸說過的話都記憶尤新：「我細個讀書好差，仲記得派份成績表，我全部都『H』，我叫擔梯。我以為爸爸一定好嬲啦，點知佢笑我喎：『你以後唔好叫Alex，叫Halex啦！』然後知道仲有得升班，就帶我出街食飯慶祝。我諗我爸爸教識我最重要就係幽默感，佢份人永遠都保持樂觀同一份幽默感。我諗呢樣係成長路上好重要，我都希望感染自己個仔。AJ都係一樣，少不免一定會遇到挫折同困難，幽默感就係當你面對一些很難解決和嚴重的問題，只要有一點點幽默感，對整件事心情就唔同晒，識得換個角度睇、識得笑，其實有咩咁大不了？」

預告：爸爸幽默、媽媽嚴格，杜德偉的爸爸媽媽如是，到了杜德偉自己成家，和太太的角色一樣如是。對寶貝AJ，杜德偉說要做好朋友，永遠不要「敦」起個爸爸款‧‧‧‧‧‧