【林嶺東猝逝】「我講嘢大聲唔代表我無禮貌」盤點影迷最愛林嶺東作品對白

2018年有好多知名人士離世，其中最令影迷意外嘅一單，可以話係拍過唔少港產片經典嘅林嶺東，在29號驚傳猝逝，享年63歲。林嶺東導演生前拍過26套戲，好似「風雲三部曲」等作品大家都應該唔會陌生，當中嘅寫實動作風格更令觀眾印象深刻！

憑卧底電影《龍虎風雲》奪金像獎最佳導演

講起卧底題材，好多觀眾都會覺得2002年嘅《無間道》係經典；不過講起80年代嘅卧底電影，點可以唔提林嶺東執導、1987年上映嘅《龍虎風雲》。哩套係俗稱「風雲三部曲」系列嘅其中一套，林嶺東更憑本片攞到金像獎最佳導演！周潤發飾演嘅警探高秋，潛入械劫集團做卧底，同由李修賢飾演嘅集團成員阿虎，變成亦敵亦友嘅關係，情義兩難全嘅糾結相當精彩，發哥死前同李修賢講嘅「我都係差人」，震撼力唔比梁朝偉在《無間道》講嘅「對唔住，我係差人」失色。結尾嘅攤牌戲更加係經典中嘅經典，荷里活鬼才導演昆頓塔倫天奴(Quentin Tarantino)都受到本片影響，在1992年拍嘅成名作《落水狗》(Reservoir Dogs)，最後一段就相當有《龍》片嘅影子。

神級對白「我講嘢大聲唔代表我無禮貌」

同樣係1987年上映嘅《監獄風雲》，可以話係「風雲三部曲」嘅高峰作。電影集合一眾好戲之人，除咗發哥外，仲有梁家輝、張耀揚、黃光亮、何家駒等人，一齊在監獄上演火爆鬥爭，既有壓逼感，更加充滿怒火。其中發哥主演嘅「老油條」囚犯鍾天正，同張耀揚飾演嘅狠辣獄長講嘅對白「我講嘢大聲唔代表我無禮貌」，絕對係神級對白，觀眾講到街知巷聞！電影當年票房大收超過3100萬港元，1991年推出過續集《監獄風雲2逃犯》，加插咗中港幫派嘅元素，同樣係賣座作品，票房超過2400萬港元。

風雲三部曲較今日港產片更有火氣及大膽

至於「風雲三部曲」最後一套，就係1988年上映嘅《學校風雲》。電影以黑幫滲入校園為題材，張耀揚飾演嘅黑幫老大、林正英演嘅反黑警探、劉松仁演嘅有心老師，個個角色鮮明，而場面上更比《龍》、《監》兩片暴烈同徹底！其中學校大戰嘅場面，比今日唔少港產片更有火氣同大膽！

林嶺東嘅強烈風格受到荷里活欣賞，佢曾到荷里活發展過，而1996年嘅《硬闖100%危險》(Maximum Risk)就可以話係代表作。電影由90年代紅極一時嘅尚格雲頓(Jean-Claude Van Damme)主演，實感動作加奇情佈局，甚有懸疑諜戰片味道。林嶺東同吳宇森、徐克等名導一樣，都係揚名海外嘅香港之光。

數到90年代，就唔可唔提1997年上映嘅《高度戒備》。搶劫金庫大案除咗有林嶺東導演耍家嘅實感動作戲外，仲有演警察嘅劉青雲、演大賊嘅吳鎮宇交出影帝級演出，令整套戲充滿火花！林嶺東比之前更加著重角色嘅心理描寫，令劇本呈現犯罪動機更嚴密，同時增加咗港產警匪類型嘅層次。

林嶺東近年再次創作力旺盛《沖天火》成遺作

2000年打後林嶺東比較少作品，但去到近年又再次創作力旺盛，2015年、2016年接連推出《迷城》同《沖天火》。林嶺東在兩套新作再次展示動作片熟練功架，而且場面規模同難度都比前作更犀利，可見佢寶刀未老。兩套作品可謂林嶺東嘅言志之作，觸及咗好多價值觀議題、對社會嘅睇法，希望觀眾反思利益之下嘅複雜人性同抉擇。好可惜係，《沖天火》意想不到成為林嶺東導演嘅遺作，日後影迷只可從佢一系列舊作重溫昔日風采。

相關字：

林嶺東 香港 港產片 港產電影 電影 電影對白 我講嘢大聲唔代表我無禮貌 我都係差人