【爆相爆片】拍劇被鬧阻街 黃翠如「耍冧」﹕代劇組向大家說聲對不起

黃翠如同郭少芸最近合作無綫新劇《過街英雄》，日前喺尖沙咀開工，《蘋果》讀者Andy日前透過爆相爆片，表示當時見到翠如同郭少芸被一班黑衣人追斬，但就因為拍攝阻街被人爆粗狂鬧。

讀者Andy話當晚約九時半，由於係重陽節前夕，公眾假期前諾士佛臺上面嘅酒吧例必多人，而《過街》劇組就揀咗一條幾乎係上諾士佛臺嘅必經之路。Andy話﹕「嗰條樓梯都幾多人行㗎，佢哋每次拍完一個鏡頭就會放一堆人行，大部份人都會願意等候幾分鐘，或自行兜另一條路行上去酒吧。但拍到十點幾，有班人唔耐煩，大聲爆粗鬧﹕『阻X住晒，拍戲大晒呀』，咁之後導演就拉隊轉去另一個地方拍。」有疑似劇組人員覺得唔順氣，一人一句反斥對方﹕「係咁X樣㗎喇….再阿吱阿咗呢….」。

咁翠如BB同少芸有冇被嚇親？讀者Andy話﹕「可能呆咗一呆啦，因為佢哋喺樓梯中間，都有一段距離，但應該聽到有人講粗口，因為啲聲入咗機，最後係要停機再拍。」黃翠如回覆傳媒時話﹕「我拍嘅時候又冇聽到呀，其實嗰日在一條後巷拍打戲，路過嘅人很好，很多都說等我們拍了一take才過，不過假如有阻到大家過路，也代劇組向大家說聲對不起。」