雅虎香港新聞 【爆相爆片】袁偉豪帶媽媽日本散心 張寶兒出口術冧未來奶奶
袁偉豪Benjamin（簡稱：Ben）可以話係港姐殺手，前年同岑杏賢分手，回復單身只有半年，就戀上同是港姐出身，富家女兼細佢一大截嘅張寶兒（Bowie）。
袁偉豪同張寶兒拍拖僅一年零數個月，仲係熱戀期，10月10日係寶兒嘅27歲生日，袁偉豪都帶埋阿媽同親友一齊去日本旅行慶祝，張寶兒同袁偉豪都分別有喺ig開live同貼相，即係例牌去旅行打卡一樣啦，開心就share。
呢次旅程結束返港，就俾《蘋果》讀者梁小姐見到，梁小姐透過「爆相爆片」表示日前晚上八時許，喺香港機場見到袁偉豪同張寶兒由日本返港，佢哋一齊坐機場嘅無人駕駛列車，梁小姐話：「見到袁偉豪同張寶兒，但佢哋冇乜傾偈，反而張寶兒同一位女士不停講嘢，同行仲有幾位較年長嘅女士，得袁偉豪一個男人。」辦完入境手續，眾人準備去攞行李，見袁偉豪都係一馬當先咁行，張寶兒則與其他人尾隨。
睇番啲相，玻璃反射見到同張寶兒傾到雞啄唔斷嘅女士，其實就係袁偉豪嘅媽媽，見佢哋咁投緣，相信袁媽媽都好滿意呢位未來新抱仔，唔知有冇機會好似陳展鵬咁閃婚呢？而袁偉豪喺上周五亦有在ig貼上一張與媽媽同行日本嘅合照，並留言：「只要媽媽快樂，我便快樂#好好建立自己的生活。」唔少網民都讚佢乖仔，因為袁偉豪嘅爸爸喺今年5月離世，一家人都需要時間走出傷痛，陪媽咪出外散心亦是一件樂事。（新聞連結：
）
張寶兒接受傳媒訪問時話唔介意放棄二人世界，佢話：「適當的時候做適當的事，陪長輩見到她們開心我都好開心。」張寶兒直言同袁偉豪各有各忙，咁啱嗰段時間得閒，所以陪Auntie之餘仲一齊慶祝生日，張寶兒話：「佢(袁偉豪)想同媽媽散心，想享受母子相聚時光，我都好幸運可以幫手照顧吓，或安排行程。」問到可會閃婚？佢笑笑口話：「應該好難閃婚吧，排期註冊已經會被發現啦，哈哈哈！但現在都想focus喺工作上先。」
精選娛聞，喺晒《娛果》
http://fb.com/appledailyent
