【用實力搵錢上車】吳鎮宇拒絕爸爸送樓 呼籲年輕人唔好靠父幹

袁詠儀（靚靚）、吳鎮宇、張達明、吳肇軒、蔡頌思、盧海鵬同楊玉梅等今晚於銅鑼灣出席新戲《家和萬事驚》首映禮，順道跟觀眾拜早年，司儀在台上講到靚靚飾演巴辣師奶，靚靚指自己是一位為老公、為頭家慳得便慳的女人。電影圍繞住屋問題，主持問到身為父母的靚靚同鎮宇有否為仔女將來置業時準備首期，靚靚：「我有啲準備，最好佢自己靠自己，有需要先適當地幫，唔好只係幫佢諗，咁佢會好廢，唔係好想佢咁。」鎮宇指當年自己父母死慳死抵為他買了一層樓準備送給他，但鎮宇反建議父親將層樓賣掉去遊埠嘆世界，他說：「我都唔會滿足咁細個單位，最後佢無賣層樓，無享受人生就咁離開咗，我想叫年輕人唔好接受父母畀屋自己。」

靚靚明顯瘦咗再靚咗，佢透露去年接咗一個劇本，導演希望佢瘦咗先接拍，拍到中段再增肥番，所以靚靚就花了個幾月，透過做運動及食營養餐而減掉近廿磅，她說：「無奈政策改咗，未拍得住，我又唔敢肥番，希望可以keep到，因為開拍後要肥番廿磅，咁都係變番之前重量，都只係幸福胖。」靚靚狀態甚弗，聽到不少讚美正面聲音，她笑指老公張智霖最近感到壓力，由於怕比下去，近日老公明顯做密咗運動。問到是否怕妳有第二春？靚靚大派定心丸說：「我諗好少機會發生我身上。」靚靚指老公沒有出聲稱讚自己靚咗，但從老公凝望自己的眼神中便得知。

電影改編自張達明於93年獲獎冠軍舞台劇，經鎮宇穿針引線後拍成電影，鎮宇大讚戲中飾演爺爺一角的達明將成為影壇新一代甘草演員，更有機會問鼎明年金像獎最佳男配角，問到鎮宇是否睇好達明？他笑說：「仲有一年先知，部戲又唔上，可能我認為好嘅部份被人剪走。」達明坦言戲中羅家英大打古天樂一幕，因為電影太長而被剪，談到會否覺得浪費心機？鎮宇說：「電影經常有呢種情況。」達明說：「張智霖都試過拍完被王家衛剪走，都係唔好講，靚靚會嬲，我哋都係講下笑。」