【簡單為主】肌肉兄弟幫手過大禮 「木偶哥」林師傑學定湊仔

30歲「木偶哥」林師傑同26歲女友歐陽巧瑩（Tammy）將於11月22日拉埋天窗，兩人忙於籌備婚禮，今日就係過大禮嘅好日子，準人妻Tammy在社交網晒相，木偶哥由兩位兄弟楊潮凱、周志康幫手，攞住幾袋大禮到女家拜見未來外父外母。

Tammy留言：「天氣咁好，最啱過大禮，順便做下運動，多謝兩位大隻佬。」相中嘅楊潮凱同周志康紥行馬步，雙手高舉幾袋大禮應付自如，企喺後面指揮嘅木偶哥一面得意，周志康都留言：「我哋呢一身肌肉，唔攞嚟過大禮真係嘥晒！」

木偶哥同Tammy婚禮好多圈中人幫手，兄弟團包括羅天宇、楊潮凱、周志康、麥秋成、張明偉、翟威廉、譚俊彥，溫家偉就同麥秋恩、劉佩玥、蔚雨芯、陳婉衡、王子涵、朱晨麗做姐妹團，伴郎係木偶哥圈外老死Samuel，伴娘係Tam妹妹Bubu。

木偶哥回覆傳媒時話：「頭先外父外母都好滿意，頭先過完大禮同潮凱、阿康飲茶，仲傾下湊仔經，都幾正，哈哈哈哈，好似真係融入咗一個屋企咁。嗰份禮有金椰子、海味，唔少禮金啦，anti都回咗少少禮俾我哋，成件事好幸福。」

問到有冇收到特別大禮？父母滿意未來女婿嗎？Tammy回覆傳媒：「其實一路都好滿意， 咁佢真係好錫我父母，之前得閒都成日飲茶同食飯。今日佢哋好開心吖！過完大禮我媽咪爹哋仲康同凱飲茶，成件事都簡單為主，心意最緊要！」