【缺席婚禮】為爭戲好姊妹反面 揭楊冪唐嫣不和原因

曾經同梁朝偉合作拍《歐洲攻略》嘅大陸女星唐嫣同演員羅晉奉子成婚，婚禮聽日喺維也納舉行，今晚就會有一個告別單身嘅patry。一對新人兩日前已經去咗維也納，做婚禮準備同拍婚紗相。今次只係請咗極少嘅影視圈朋友去觀禮，初時好多人以為伴娘係好姊妹楊冪，四年前楊冪結婚都係由唐嫣做伴娘，同時唐嫣係楊冪唯一請嘅藝人去觀禮，可想而知佢哋感情係好深。

但諗唔到時間會改變一切，唐嫣伴娘團名單曝光，有好友劉亦菲、張靚穎、呂一與陳鈺琪，但竟然冇楊冪，令外界好奇。聽講唐嫣有派帖俾佢，但佢以公事忙推咗，因為楊冪早已經疏遠佢。

話說三年前黃百鳴公司籌拍《賞金獵人》，唐嫣同楊冪都爭取同韓國人氣偶像李敏鎬合作機會，結果唐嫣勝出，之後陸川開《尋龍訣之九層妖塔》，導演喺兩女之間擇其一，最後選了唐嫣。

到前年開始，網上一路有出現楊冪好感度下降嘅傳聞，兩女的工作團隊都要爭微博熱搜榜第一位，楊冪工作室不滿有些黑粉唱衰楊冪，楊粉認定係唐嫣嗰邊搞偶像。

後來唐嫣工作室嘅工作人員喺微博轉發一篇踩楊冪演技嘅文章，事後就解釋俾人盜用咗個帳號亂發嘢，解釋牽強到冇人信，自此就傳出楊冪同唐嫣正式交惡，冇乜來往。

以前楊冪同劉詩詩都係好老友，後來因詩詩越嚟越紅，楊冪同佢就冇乜來往。所以……楊冪可能真係冇幾多朋友。