【罕有認分手】竹野內豐回復單身 飛恨嫁倉科加奈

47歲日本型男竹野內豐，今年夥拍綾瀨遙嘅劇集《繼母與女兒的藍調》於當地反應極佳，日前佢又被日男選為「第10屆最想擁有男星面孔」嘅冠軍，令外界又再關注豐哥嘅感情生活。

新一期雜誌《女性自身》爆料，得知豐哥已經同F Cup女星倉科加奈分手收場，雖然30歲嘅倉科恨嫁恨到出面，但一度盛傳結婚嘅二人最終都有緣無份，豐哥發言人仲罕有地向記者承認佢哋已在數月前分手，令倉科榮升「豐嫂」無望。據透露，倉科樂觀地面對今次分手，最近享受一個人去食日式烤肉，又打算去學陶藝、騎馬同埋日本舞來充實自己。

豐哥入行多年緋聞唔多，仲被指佢以異性緋聞來掩飾同志身份，當地同志界一直流傳豐哥同一個香港男星曾有斷背情，當事人豐哥幾年前上《SMAPｘSMAP》受訪，主持中居正廣居然在鏡頭前提起豐哥嘅同志傳聞，搞到尷尬嘅豐哥連忙否認。

其實豐哥同倉科加奈分手都算有迹可尋，喺今年7月底，見豐哥戴住口罩去買餸，仲同班師奶排隊等付款，之後再於一間受女性歡迎嘅店舖買二人份沙律，最後再去買蛋糕返母親屋企。其實豐哥出名孝順，四年前為雙親購入豪宅，佢自己就喺另一寓所居住，可惜父親離世只剩媽咪獨居，所以佢不時抽時間照顧母親。