【被指「邪教」】伊能靜疑推薦靈修課程出事急刪文

大陸有唔少被定義為「邪教」嘅組織，界線唔太清晰，有時真係隨時出事，好似伊能靜就因推薦靈修課程，被大陸網民批評，伊能靜近日喺微博推出網路節目《米粒媽食堂》，吸引唔少媽咪級嘅fans收睇，佢噚日喺微博貼出來自印度嘅靈修課程，網民直指呢個係「邪教」，搞到伊能靜即刪文，文雖然刪走，不過「伊能靜賣課」嘅關鍵字就上咗微博熱門搜尋器。

據台灣報道指，伊能靜於10年前生命最混沌嗰陣，去咗印度見阿瑪巴關老師，開始靈修，佢噚日貼出老師喺北京、上海同廣州等各場次嘅活動時間，佢強調與信仰無關，而自己上堂都要畀錢，網民先指呢啲係心靈課程嘅傳銷，「一節課上萬的，且都是避稅的，也就是違法的，公眾人物不該發佈這種信息」，另有網民又指「按照中國對邪教的定義，這個合一學院顯然具有邪教組織特徵，其在中國境內開展的任何活動都是違法的」。

伊能靜呢篇文章引起「中國反邪教協會」注意，協會微博表示：「在很多人眼裡，印度這個國家，似乎從來不缺少『大師』，提個醒吧。」協會更轉貼印度一啲類似嘅心靈課程新聞「囚禁近200名少女!『靈魂大學』裏的骯髒」，提醒網民了解類似課程曾存在危險。

伊能靜已刪除微博留言，並未對外做出回應，據知伊能靜並非首次分享此機構，過去曾提到自己去印度「合一大學」上課，拜訪靈修聖地「曙光村」（Auroville），透露同學不乏知名人物。

大陸以《中華人民共和國刑法》認定「邪教」為「冒用宗教、氣功或者其他名義建立、神化首要分子，利用製造、散佈迷信邪說等手段蠱惑、蒙騙他人，發展、控製成員，危害社會的非法組織」。未知伊能靜所推薦嘅，係唔係如網民所講係「邪教」?