【超犯規寵妻】吳鎮宇洗碗煮飯湊仔一力承擔 九成財產歸老婆管

57歲嘅實力派演員吳鎮宇，出晒名演技精湛，憑《逆流大叔》入圍今屆金像獎最佳男主角。除咗拍攝電影之外，佢最令觀眾印象深刻嘅一定係喺無綫劇集《衝上雲霄》飾演嘅機長Sam哥。

除此之外，無綫近期深夜時段播放緊佢有份主演嘅經典處境喜劇《卡拉屋企》，吳鎮宇喺劇中飾演「泰臣」廖通泰，同由李婉華飾演「蒂哥」黄蒂由鬥氣冤家發展成夫婦。兩人現實中朝夕相對日久生情，所以同樣有過一段長達8年的戀情，當時一直被外界睇好，不過於1997年兩人正式宣佈分開。

而家有一段美滿婚姻嘅鎮宇，除咗有一個10歲嘅仔仔Feynman之外，有一個將屋企打理得頭頭是道嘅好太太。鎮宇1998年喺酒吧經朋友介紹下認識當時喺新加坡做模特兒兼演員嘅王麗萍，兩人一見鍾情。拍拖4年後決定拉埋天窗並於夏威夷及泰國舉辦婚禮。

鎮宇愛妻如命，知道太太由新加坡跟佢嫁到香港，一個親人都唔喺身邊，所以鎮宇決定將太太寵到公主一樣。屋企所有家務，洗碗煮飯賺錢湊仔都由鎮宇一力承擔。幾年前王麗萍更為佢客串內地綜藝節目《爸爸去哪兒》，當時佢更表示自己由1998年拍拖至今先第一次煮飯。

除咗對太太寵如公主一樣照顧之外，有指鎮宇更將自己大部份收入交由太太管理。鎮宇同老婆開咗一間聯名公司，據知公司係太太佔八成八股份，而鎮宇自己佔一成多。佢哋仲以公司名義購入咗一間市值1.2億嘅西貢海景大屋。另外，太太仲有一間市值一千萬嘅商業單位，係由老婆自己擁有嘅一間公司名義購入。

由此可見，王麗萍嫁咗俾鎮宇後，除咗專心相夫教子之外，更將鎮宇所俾自己嘅財產打理得頭頭是道，令到鎮宇就算出門工作，都可以好放心！