傳有內地公司開天價邀請過檔 炎明熹Gigi現身活動透露未與TVB續約：我都唔知個結果會點

炎明熹Gigi今日現身機場活動就再次被問到續約問題：Gigi就直言：「合約呢啲事情比較私人，可能大家都有唔同嘅結果，因為呢個世界都未到末日嗰一日，所以我都唔知個結果會點。」（仲喺到傾緊？）Gigi指：「仲喺到傾緊。其實自己有好多想法，好似音樂嘅方向會點樣行？自己嘅風格會點行？其實都有好多唔同嘅因素，因為呢一個世界有太多未知嘅事情，所以自己都會好欣然接受唔同嘅轉變。」

另外亦有指有內地公司開天價簽Gigi，Gigi就表示震驚：「竟然！你喺邊到聽返嚟㗎？」Gigi亦直言唔知有呢啲消息：「如果大家有呢啲消息都可以Send俾我，因為我自己都唔知道。」對於會唔會想有新發展，Gigi就指：「每一個發展都係好事，但係都有啲壞事，所以都未知道自己最終會點發展。」Gigi亦強調所有事情都想嘗試，更笑言有可能日後會去做空姐：「盡量做咗眼前嘅事情先。」

被問到今日TVB再次沒有派人採訪，Gigi亦為公司解釋：「我覺得都係檔期問題，同埋太遠啦！我諗佢哋亦都有各自要訪問嘅事情。」

談到日前拍片演唱前輩李玟Coco歌曲疑似啜泣，Gigi就澄清因為唱歌有唔滿意嘅地方而 唔開心，不過強調近日情緒穩定。