雅虎香港新聞 【防曬須知】SPF、PA、UVA、UVB如何區分？4點即知要害揀防曬用品
未踏入5月，香港嘅天氣已經開始炎熱，陽光亦非常猛烈。無論你鍾唔鍾意同陽光玩遊戲，都一定要做好防曬準備！
半塊面沒防曬28年後變成咁？美國大叔的人體實驗
小編最近睇到一篇研究，講述一位美國嘅貨車司機叔叔，用自己塊面嚟做實驗，話俾大家知陽光對皮膚造成嘅傷害。呢位無做防曬措施嘅叔叔，每次揸車送貨時，左邊面都被陽光照射，如是者過咗3年，佢開始發現自己左邊面有皺紋同粉刺，某啲部位仲出現囊腫型粉刺。而過咗28年之後，佢左邊面同右邊面竟然有咁大差別！(下圖)
由此可見，防曬功夫真係唔少得。坊間對防曬都有唔少謬誤，小編精選以下4點，教你點分SPF、PA、UVA、UVB，即知要害揀防曬用品，希望大家享受陽光嘅同時，都可以好好保護自己嘅皮膚。
1. 什麼是UVA、UVB、UVC？
太陽光除咗紅、橙、黃、綠、青、藍、紫，仲有肉眼見唔到嘅光，包括經常提到嘅「紫外線」。
科學家根據紫外線(UV，ultraviolent)嘅波長(wavelength)，分為A、B、C三種，波長越大，穿透能力就越強。穿透力較差嘅紫外線B同C會被大氣層阻擋，只有穿透力最強嘅紫外線A同好小部分嘅B(約5%)能到達地面，亦解釋到點解防曬產品只針對紫外線A同B，而好少針對紫外線C。
2. UVA、UVB有什麼害處？
紫外線B穿透力低但能量較強，傷害會喺皮膚表面形成，例如曬紅及曬傷，嚴重者會導致皮膚癌。相反，紫外線A穿透力強但能量較低，傷害會喺皮膚深層形成，導致曬黑同老化。據世衞資料，有8成皮膚癌係由過度曝曬所引致；亦有2成白內障與曝曬於紫外線下有關，由此證明防曬真係好重要。
3. 什麼是SPF、PA？
SPF同PA都係防曬用品常見嘅數值：
SPF(Sun Protection Factor)，主要針對紫外線B。SPF值越大，效果就越高。簡單嚟講，假設小編喺太陽下曬10分鐘後皮膚開始變紅，用咗SPF10嘅防曬產品，就可以延長10倍，即係小編會喺100分鐘之後皮膚先會曬紅。
PA(Protection Grade of UVA)，顧名思義，主要阻擋紫外線A。PA + 代表輕度防曬（有效時間 2-4 小時）；PA＋＋代表中度防曬（有效時間 4-8 小時）；PA +++ 代表高度防曬（有效時間 8 小時以上）。目前最高防曬標準 PA++++，有效時間為 16 小時。
就香港嘅夏天嚟講，搽SPF20－25嘅防曬產品已足夠，戶外活動嘅話就建議 SPF30－35 。
4. 防曬用品點用好？
大家首先要搞清楚自己要防UVA定UVB？若果你一心想曬黑，要好似古天樂咁有型，就應該用針對防UVB嘅防曬；如果你只係擔心曬黑同出皺紋的話，就應該用防UVA嘅產品。
要發揮防曬產品嘅最佳效用，建議出門前10至20分鐘前，均勻搽喺面部同會接觸到陽光嘅部位。如果使用防曬噴霧，就要避免直接噴面，應先噴喺手上，然後再搽面。由於流汗、抹汗同游水等都會流失防曬功效，所以最好每2小時補搽一次。
防曬口訣ABC 幫你做好防曬
A(Avoid) ：避免喺上午10點到下午2點進行超過20分鐘嘅戶外活動，夏天的話最好延後到下午3點。
B(Block)：外出要搽防曬產品，依所處環境選擇合適嘅防曬系數，並謹守 2 小時補擦一次嘅基本原則。
C(Cover)：除咗搽防曬，擔遮、戴帽、戴太陽眼鏡、著長袖衣物等，加強物理性防曬。
單邊沒防曬28年會發生什麼事？這位大叔用自己的臉教你UVA與UVB造成的問題－防曬全攻略1
相關字：
防曬 防曬用品 物理性防曬 紫外線 UV SPF PA UVA UVB 香港夏天
