【霸氣家姐】張嘉兒宣佈陀第二胎 大女唔准爸爸錫媽咪肚

近年人妻女藝人生完一胎，好快緊接再生。已有一女嘅前港姐張嘉兒，今日喺Instagram報喜，佢宣佈已懷第二胎，預產期係明年5月，即將生豬B。

本月中午35歲牛一嘅07年港姐冠軍張嘉兒，15年喺加拿大溫哥華嫁給金融才俊Nathan，翌年在港誕下囡囡Leora，轉眼囡囡已兩歲，亦係適當時間追多個。張嘉兒今日喺Ig開心share：「踏入11月啦。呢個月份亦都係我嘅生日月份。好想同大家分享一個喜訊就係我再一次懷孕啦。今次陀BB，比上一次辛苦同埋攰好多，真係每日淨係想黐住張床，不過係唔可以嘅，因為我仲要照顧我個女。作吐作悶嘅次數亦都多咗，聞到有油煙味都會感到不適。話雖如此，我好感恩同埋好開心上天送一份咁大嘅生日禮物俾我。

「一諗起將來多一個小朋友會帶俾我哋一家人嘅歡樂，所有辛苦都變得值得。有人話養兒100歲長憂99歲，計我話係長喜99至真。我依家真係好想我嘅energy快啲返嚟，等我可以計劃我嘅baby-moon。你話我去邊好呢意大利，馬爾代夫，定日本？#意大利又驚天氣凍#馬爾代夫又唔知適唔適合大肚婆#日本又唔知會唔會啲輻射影響#大家有咩提議呢#mamacollege#小寶貝做家姐啦#希望BB身體健康 #係我個肚入邊健康成長。」

張嘉兒仲貼出一條短片，片中佢問囡囡：「媽咪個肚有乜？」Leora答：「有BB。」張嘉兒再問：「有乜話？」Leora好肯定再答：「有BB。」張嘉兒就叫囡囡錫媽咪一啖，Leora好乖照做，氹到張嘉兒好開心。《蘋果》今日致電張嘉兒，問到佢陀第二胎情況，佢話：「陀呢胎辛苦好多，因為同時湊囡囡，多咗作嘔作悶感覺，o依家剛剛有咗3個幾月，預產期5月，依家有開始同囡囡講肚裏邊有BB，佢會錫吓我肚，佢又聽吓我個肚，可能佢以為個BB屬於佢，佢唔畀我老公聽我個肚。」