62歲魯振順有心有力 想搞大女友個肚：可能上天畀我呢！

藝人魯振順日前接受范振鋒主持嘅新城節目訪問時自爆婚訊！佢話女友比佢年輕6歲，而呢對「黃昏戀」原來早於41年前已結緣，女友係當年歌唱比賽認識嘅女同學，正計劃於疫情後結婚！佢表示獲高人改名為「釋禧」後，重遇對方：「以前唔算有太多交流，好奇怪，喺上年佢睇完我訪問後，了解咗魯振順，原來我係咁慘，又覺得我好真，居然搵番我。」

相信緣分嘅佢，指可能係逝世嘅媽媽安排，佢話：「2017年阿媽走咗，佢叫我好好活下去，點知冇耐女友就出現，連佢（女友）都話可能係阿媽派來陪我。」佢坦言一直恨組織家庭，尤其見到陳榮峻與吳香倫結婚。至於婚禮，佢表示計劃大排筵席，全由女友負責，待疫情完結後舉行婚禮：「佢成日話要幫我爭番口氣，唔好成日都話我係Gay！」

魯振順曾於訪問表示，29歲時向拍拖7年嘅女友求婚卻慘被拒婚，分手後前度更自爆曾為佢墮胎，令佢大受打擊，加上事業不順，佢試過割脈自殺，幸最後將感情事看開，現遇到心目中嘅賢內助。足本訪問將於2日晚凌晨才播出。而范振鋒則表示：「好鬼震撼，聽到時自己都打個突！」

魯振順之後接受訪東網電話訪問表示，自己還未求婚：「我哋好多嘢都心領神會，所以都冇求婚，之後都會做番嘅。（預幾時結婚擺酒？）應該明年年尾左右，要睇疫情嘅情況而定。」談到生兒育女的問題，魯振順笑言自己4月尾過埋生日63歲，女友都50多，雖然他因很喜歡小朋友，但明白都比較渺茫，不過都會盡力，還笑言：「好多嘢好難講，可能上天畀我呢，一切順其自然啦，不過，女友都講過可能會領養。」

談到愚人節公開婚訊，他笑言：「咁要多謝范振鋒佢哋，因為我係10幾日前同佢哋做訪問，咁啱佢哋今日宣傳，所以令唔少人有呢個誤會，我都有少少慌失失，女友其實都唔想我咁快講。」至於重遇經過，他表示41前認識後，之後大家沒有來往，但女方有Keep住自己的合照，以及留意他的消息，直至他母親離世，女友透過梁競徽母親取得自己電話，之後大家再聯絡，對方更曾整水餃給他吃：「我食一啖已經喊咗，好有我媽咪嘅味道。佢仲話可能係我媽媽派佢嚟照顧我。」

曾與魯振順合作劇集《多功能老婆》嘅朱晨麗，得悉後亦表示戥對方高興：「佢係個好Sweet、好開心嘅人，另一半同佢一齊日日都會好開心。搵到個伴陪佢度餘生，恭喜先！」而好友楊茜堯接受訪問時坦言不知道對方結婚，但都很戥對方開心，可以找到人生另一半。講到不少人以為他是GAY，楊茜堯說：「身為朋友送上祝福就夠，其他任何嘢唔需要去猜測，希望疫情之後佢結婚我哋都能嚟參加就好喇！」

魯振順演活過無數角色，1996版《笑傲江湖》的「東方不敗」、《真情》的「唐明」、《十月初五的月光》的「徐來順」、以至近年《多功能老婆》的齊名順都令人印象深刻。他曾在訪問表示曾演過電影《天皇巨星》，出街後反應不佳，更被罵為甚麼他的角色是天皇巨星，他表示其實是劇本寫，但那種恥笑和奚落絕不好受。