【6,600萬愛巢共度餘生】向謝偉俊耍冧道歉 白韻琹：我令佢好難過

89年，才女白韻琹和律師謝偉俊（Paul）相遇，開始了兩人的愛情故事，白姐姐比Paul大了14年，他們不理世俗的眼光，於97年結婚。似水流年，兩人相識至今30載，共同經歷了幾許風雨，其間白姐姐曾因逃稅坐監、Paul曾被罰停律師牌1年，現年74歲的一代才女白姐姐，甚至傳聞她有腦退化！

日前《蘋果》相約兩人做專訪，到訪他們位於西半山的豪宅，這間坐擁千呎空中花園的愛巢，兩人於前年斥資6,600萬元購入，行動緩慢的白姐姐帶記者參觀全屋，睡房內掛有畫家冉茂芥替她畫的裸體像，停車場有方逸華送給她的保時捷，訪問期間跟老公互笑互窒，原來，30年來兩人從沒跟對方說過「我愛你」，現60歲的阿Paul只願74歲的白姐姐身體健康，回首前塵往事，一向愛面子的白姐姐，竟公開向Paul耍冧認錯：「我都應該向你道歉嘅，令你有咁多難過嘅日子！」

訪問內容如下：

記：第一眼見到對方嘅印象？
謝：佢就係而家咁嘅貓樣，咁多年都冇乜點變，記得好似又係戴頂帽，眼又係咁大，皮梗係冇而家咁皺啦，哈哈哈！我記得嗰次係王穎導演《一碗茶》首映，繆騫人做主角，當時我有兩個律師行家約咗白姐姐睇電影，臨時叫埋我去，睇完戲之後去酒店飲咖啡，呢個就係我哋嘅首次開始。
白：佢有100分，我眼水都流埋。（用紙巾抹眼水）
謝：而家流眼水，當時流口水係咪？嘻嘻！
白：我對你流口水，你唔係講笑嘛！

記：有冇介意過白姐姐大你14年？
謝：其實冇乜介唔介意，不過當然初期會多人有啲另類眼光、批評，包括屋企人初初都唔係咁接受，呢啲一定會有。
白：你咁講，啲人又嚟過唔老利我。
謝：1歲同2歲嘅分別就係多一倍，我哋而家差唔得幾遠㗎。
白：唔係㗎，真係好遠。
謝：我諗用大家嘅相處同時間證明一切，而家一齊都30年，正常男女3年一個循環，已經換咗十次畫，我哋仲喺度，證明大家相處都ok。

記：最愛對方係邊方面？
謝：或者用喜歡，唔好用愛字咁strong，當然佢有好多吸引人地方，性格上幾可愛、率直，佢好尊重我，好多地方都好忍讓我，更加重要係佢明白到男女相處之道，特別係成熟嘅成年人，係需要多啲空間、多啲自由，彼此扶持同時唔好太多要求、限制。
白：樣樣都鍾意，我覺得佢係一個非常好嘅人，對朋友又好，對屋企人又好，對我更加冇得彈啦，日日都有好多感動嘅嘢，我唔記得斟茶飲，佢就會斟畀我。

記：互相覺得最惡頂地方？
白：我唔覺得佢有乜難頂，佢份人冇話堅持呢樣嗰樣，而且你諗吓，我哋冇乜利害關係，應該好容易相處。
謝：我諗半講笑呢，白姐姐係止痛膠布黐到實，有時當我忙，又要照顧佢，就比較困難，但呢個都唔係惡頂嘅，都係自己選擇，但坦白講，有時難處理嘅係，白姐姐有時率直得滯，譬如人哋問佢身體點呀？佢會好忟憎：「我有乜嘢問題呀？」譬如有人問：「你記唔記得我吖？」跟住佢話：「我點解要記得你呀！」我見到對方嘅面色，有時要幫佢打圓場。
白：佢覺得我好倔，有碗話碗有碟話碟，我覺得唔需要裝扮呀。
謝：唔係裝扮，但有時同人相處，呢啲係EQ嚟，人哋都係出於好心，我戥嗰個人尷尬。
白：唔係啩，我唔係咁得人驚，人哋都唔知幾鍾意我，我係一條腸直通落地下。
謝：你後生女、靚女時冇所謂，但當你咁上下年紀呢…
白：而家老咗呀？
謝：你應該有啲智慧、深度啲。
白：我冇咩，我覺得我唔使深度呀，真誠啲有乜所謂。

記：20幾年婚姻，有冇經歷好大風雨？
白：我唔覺有。
謝：你同傳媒一齊夾份做我嗰啲囉。
白：我冇夾份做你呀，係你整到好有嫌疑，啲人造畀我聽，咁我又覺得冇乜所謂，家家有求啫嘛，你鍾意出去滾女仔，我都可以出去滾男仔。有冇懷疑Paul曾經出軌？咁複雜嘅嘢何必去諗，如果唔係嘅，諗咁多嘥你啲氣，如果係嘅，佢未必會改，所以順其自然，但我認為阿Paul冇乜呢啲嘢。
謝：其實呢啲都係小意思，反而我哋一齊相處，記憶中最困難有三個階段，第一個就係同鄭經翰打官司嗰幾年，一直打到終審；第二個階段就係雖然我有志向想改革法律行業，但其他行家可能睇法唔同，又打成6、7年官司，停咗個牌添，相處時間好多時要孭住呢啲官司同壓力，本來我哋可以更加開心，而家都有啲折扣；第三，大家可能淡忘咗，（問白姐姐：介唔介意我講？白：講乜嘢？）你嗰個稅嘅案件，呢樣都係困難階段，而家事後睇番都係難忘經歷，人生多多少少有啲債，無論病痛又好訴訟又好感情又好，都有啲up and down，呢啲已經過咗，相對而家係平穩階段。

記：點樣互相扶持？
白：我覺得佢扶持我啫嘛，我唔使扶持佢，佢好獨立可以自己解決，我有啲儍更更，唔知自己做錯乜嘢講錯乜嘢，都係要搵阿Paul幫我補鑊，所以我要好多謝佢，畀我咁放縱。
謝：包括稅嗰次，我係警告咗白姐姐，應該小心處理，當時如果你肯聽我講，會少好多麻煩，但你的確冇聽我講瀨咗嘢。（監獄日子）嗰排辛苦囉，差唔多日日都去…包括事前有段時間，稅務局將白姐姐個案攞嚟祭旗，於是我哋搞咗啲示威抗議行動，瞓咗街成個禮拜，跟住審嘅過程又痛苦，事後…
白：好似奇特嘅電影咁，我根本唔記得晒呢啲嘢，冇當一回事添。
謝：事後睇番係人生一個挑戰，好在我哋嗰時仲係年輕，如果而家60幾70歲仲要過呢啲關頭呢，更加難受啦！
白：相信人喺世界上，冇乜邊幾個係風生水起、一帆風順，個個都有艱難嘅嘢、不可對人言嘅嘢，睇每個人點去處理，對於我嚟講，其實好簡單就過咗，但對於阿Paul呢，佢個人好深思熟慮同好小心，所以我令到佢好難過，呢樣嘢我認真向佢道歉。
謝：哈哈哈，包括我44歲生日影嗰張相，本來都死唔去，但張相呢，白姐姐話影啦影啦，事後睇番冇乜嘢，亦唔係冇着衫，只係取巧，不過當時將兩樣嘢擺埋一齊，畀自己無謂嘅風險。
白：佢一個人承受晒，我哋喺側邊風涼水冷睇戲咁睇，呢樣嘢呢我應該向阿Paul道歉嘅，但係當其時佢又肯聽我，我又亂咁噏，所以…我都應該向你道歉嘅，令你有咁多難過嘅日子！
謝：道乜鬼歉呀，算啦，幾十年。
白：好serious向你認錯，我錯了，嘻嘻嘻！（兩人相視而笑）

撰文：余燕儀
攝影：沈健程
攝錄：廖達燊