【UA結業】香港5大戲院院線 百老匯一條龍業務全港最大 Cinema City英皇近年崛起

喺香港經營36年嘅UA院線，因為受到疫情打擊，近期傳出財困，早前更將開業不足一年、位於K11 MUSEA嘅K11 Art House戲院，出售俾另一院線營運商MCL。但係UA最終喺今日宣布清盤結業，令影迷為之惋惜。

香港地方雖然細，但係戲院營運市場競爭激烈，未計UA已經有5條坐擁多間戲院嘅院線。營運商可能都深明淨係做戲院好難維皮，票房收入要同片主拆賬，所以佢地都各自有電影相關生意。

百老匯院線

1950年商人江祖貽開辦第一間百老匯戲院，到90年代開始擴充經營，現時成為全港最大院線，擁有13間戲院，估計佔全港市場份額3分1。旗下4個品牌（百老匯、PALACE、My Cinema及MOViE MOViE ）由裝修到零售配套各有定位，近年更打入內地市場，喺中國多個大城市開設精品式影院。

百老匯而家嘅揸fit人江志強同時經營安樂影片，主理影片發行及電影廣告生意，但係最大生意應該係電影製作。江生由千禧年後開始投資拍戲，《卧虎藏龍》更加係佢得意之作，之後多套大片《英雄》、《色．戒》、《捉妖記》、《寒戰》等都取得成功，一條龍經營更加確保「肥水不流別人田」，龍碘地位更加穩陣。

MCL

由洲立影藝經營的MCL院線1982年成立，母公司2013年出售大部份股權俾林建岳嘅豐德麗，本身已經擁有寰亞電影嘅林生，有埋屬下戲院，同樣能夠以「一條龍」模式賺到盡。現時MCL有12間影院，住宅區、商業區同旺區都有，早排以5600萬收購UA嘅K11 Art House，並且將會喺2023年開始，接替百老匯經營尖沙咀The ONE戲院，令本身市佔率17%嘅MCL，將會成為全港最大院線，向「一哥」百老匯挑機。

Cinema City

由電影人黃百鳴父子創立嘅天馬影視，本來係拍戲起家，2014年起經營旺角朗豪坊嘅戲院，命名為Cinema City，後來再拓展版圖至銅鑼灣、荃灣、柴灣及九龍灣EMax，短短幾年已經取得近一成市場份額。2017年黃百鳴將天馬過半數股份轉售俾內地商人，並改命為傳遞娛樂。今年1月傳遞娛樂將Cinema City三間戲院連同其他業務賣返俾黃百鳴，並且將朗豪坊嘅戲院交由黃百鳴管理。

英皇戲院

做開娛樂業務嘅英皇，2014年先喺內地開展戲院業務，2017年再回歸香港，第一個據點就係多年未有新戲院嘅中環鬧市。3年間英皇喺香港開咗6間戲院，其中4間位置都喺新市鎮，短短時間內已經拎到11%市場。

嘉禾院線

早於1970年已經成立，曾經擁有歷史悠久嘅銅鑼灣紐約戲院、佐敦大華戲院。有超過50年歷史嘅海運戲院仍然屬於嘉禾院線，但係裝修後座位數目大減。院線聲勢亦都大不如前，現時有7間戲院共24個銀幕，市場佔有率不足一成。