七公主｜林夏薇演技大爆發 獲網民支持問鼎視后

無綫劇集《七公主》正在熱播中，女主角之一嘅林夏薇憑住超凡演技而受到劇迷讚賞。劇中林夏薇飾演嘅顧語嫣一直未能走出老公過身嘅傷痛，劇中多場竭斯底里爆喊嘅戲, 令觀眾都感受到角色嘅悲慘痛苦。繼早前全裸背部兼露股挑戰身體底線後，前晚嗰集顧語嫣（林夏薇飾）同亡夫隻貓「阿懵」病重身亡嗰場戲，林夏薇再次演技大爆發，唔少網民都話「喊死！林夏薇真係做得好好！」、「林夏薇超正！搶晒戲！」、「佢做得好好，每次喊觀眾都跟住喊」及「鍾意林夏薇條線，好笑又好喊。」等等。林夏薇為咗顧語嫣一角，未開拍已經喊左好多次。由於角色情緒起伏好大，拍攝時大家都好驚佢患上抑鬱。

2009於北京中央戲劇學院戲劇學院表演系畢業嘅林夏薇，出道時憑住「林峯堂妹」之名加入娛樂圈，當時唔少人認為佢係靠關係入行。薇薇喺2015年與富商男友結婚，立即升呢成為闊太，林夏薇婚後生活相當富貴，同老公住喺位於山頂嘅獨立屋豪宅，估計市值已超過15億。佢試過為家庭而暫別幕前，但後來佢選擇繼續追夢，而老公都好支持佢。薇薇嘅演技亦開始得到大眾認同，慢慢冇再標籤佢做「林峯堂妹」及「闊太」，喺2015同2016連續兩年奪得《星和無線電視大獎》我最愛TVB女配角。2019年更憑《十二傳說》潘朵拉教授獲得關注，網民大讚佢演技有進步，而今次薇薇飾演顧語嫣獲得網民一致讚賞，更認為佢可以憑角色喺年尾問鼎視后寶座。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！