上下同露 做足打底 JW低胸籌款做手腳

歌手JW為慈善騷拋胸露腿演出，生得細細粒的她獲讚顯高又顯瘦，為免太性感，她自爆將Deep V領口收高。而港姐宋宛穎與梁凱晴輕鬆玩遊戲，就籌得100萬善款。

JW前晚演出無綫慈善騷《博愛歡樂傳萬家》，首次獻唱新歌《納斯卡線》，之後再孖馮允謙演唱以愛為主題的串燒歌。她身穿黑色低胸高衩晚裝，坐在後台更大晒白滑美腿，笑言有做好打底，又表示：「本身條裙仲低胸啲，我整高咗，做慈善騷費事太性感。（個衩有冇修窄？）冇！條裙好安全，連膠紙都唔使黐。」

她透露對新歌《納斯卡線》參與度很高，親自搵Howie作曲，再由監製搵黃偉文填詞：「第一次同佢哋合作，好開心，喺籌備過程自己真係學識咗好多，連歌名嘅字體我都特登搵人設計。」並解釋歌名是指秘魯沙漠上很多巨大的地畫圖像，最奇妙之處是，若非從遠處或高空俯瞰，很難看到全貌：「歌詞係比喻暗戀一個人，畀晒暗示或者走得太近都未必可以。」

宋宛穎梁凱晴籌百萬

至於應屆港姐宋宛穎與梁凱晴玩「七巧板」遊戲籌得100萬，而汪明荃夥拍鍾柔美合唱《迷人Pink Lady》，雖然年齡相距差不多60年，但甚有默契，又合拍地做出心心手勢，籌得150萬港元。羅家英跟太太汪明荃睇齊，他跟王志良合演的粵劇《高平關取級》同樣籌得150萬善款。壓軸出場的關心妍大讚無綫貼心，安排歌手逐一到場錄影：「係清晒場，做好防疫措施，唱得好安心。」她於去年底到內地為專輯宣傳，逗留了2個月才返港：「好彩嗰時第5波未咁犀利，如果唔係都未必返到嚟，依家計劃暑假再到內地宣傳同做巡演。」