翟威廉離巢TVB後認有多位性伴侶「反正冇fans架啦」自爆喺大台月入至少x萬

2010年香港先生冠軍翟威廉，今年3月同TVB約滿後離巢，現時打理清酒生意，亦會自由身接演出。可能冇大台睇到實，翟威廉近日接受專訪時直認有唔少性伴，甚至以「數量驚人」嚟形容！

39歲嘅翟威廉，入行多年只係認過同陳庭欣拍過拖5年，近年就曾經同女歌手麥貝夷傳出緋聞，但就被女方指責翟威廉當佢係「炮友」。今次受訪翟威廉坦認有超過10年搵SP（性伴侶）嘅經驗，數量保密但就肯定多，相熟嘅有幾個，連日韓嘅都有。翟威廉話同SP啱時間啱mood就約，大家唔過問對方私生活更唔會理對方有幾多個伴侶，擺明享樂行先。

翟威廉講明一定做足安全措施，而且唔會講大話同強迫，雖然小心行事但佢都話「瀨過嘢」，只係唔肯講詳情。翟威廉話娛圈唔少藝人都有低調搵SP，而自己暫時未打算定落嚟。咁公開自爆，翟威廉話唔想嘥時間講大話，而且「反正我都冇fans架啦」。睇返資料，翟威廉曾自稱同陳庭欣分手後一直單身，被爆同麥貝夷拍拖時已承認自己有性伴。

除咗自爆繽紛生活之外，翟威廉都有提到喺TVB收入，佢話最高峰時期計埋爆騷可以月入超過5萬元，即使近年情況麻麻，但因為包薪所以少極都有3萬元，而佢仲有其他收入來源，因此唔做TVB影響唔大。翟威廉當年喺TVB做過唔少乞人憎角色，佢話自己同黃祥興啃過唔少呢啲「豬頭骨」，如果TVB搵佢再拍劇，假如做奸角但係有得發揮的話都會接，希望保持關係。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！