不正常愛情研究所｜J2主持文頌男突全身乏力及痛楚再入院：個天係咪真係咁唔鍾意我

前J2節目《不正常愛情研究所》主持之一嘅文頌男（Koba），去年年底自揭喺椎間近盤骨附近位置確診惡性尤文氏肉瘤，需全面停工休息及接受治療。喺較早前，樂觀抗病嘅Koba指經歷五次化療後，醫生宣佈治療無效，腫瘤唔單止冇縮小，反而仲變大咗，令佢大受打擊。之後，佢喺醫生建議情況下完成28次電療，雖然佢指痛楚的確係有減輕，不過近日佢因全身乏力及痛楚，叫救護車入醫院。

近日，文頌男喺IG上載自己瞓喺醫院床上嘅照片，並交代近況：

「我又入醫院喇…其實由五日前開始都好唔舒服，一開始係好似有啲感冒嘅感覺，又會不停標冷汗，右上背無緣無故肌肉痛，條頸好似瞓捩頸咁，痛感一直扯到上去右邊頭部後尾枕，搞到持續頭痛。全身又有小小發軟、用唔到力，尋日仲發現食晚餐嘅時候咀嚼都冇力，舌頭右邊都好似用唔到力。右上背試過貼唔同嘅鎮痛藥膏、做按摩，但係都冇用，持續五日都係咁痛，啲痛楚搞到我咩姿勢都好唔舒服，瞓喺度又唔係，企喺度又唔係，坐喺度又唔係，瞓覺都好難瞓到。試過攞個頭撞卷廚房紙，好似好少少。最後真係頂唔順，叫咗救護車入醫院。

我就諗：「唉，點解啲痛苦要一浪接一浪，明明啱啱先電療完，下肢啲痛開始減輕咗好多，即刻又嚟第二種痛，到底個天係咪真係咁唔鍾意我，由細到大，甚至到呢個病，都係要不斷折磨我，唔想我好過。到底個天要折磨到我幾時先肯放過我？係咪要慢慢折磨到我越嚟越虛弱、越嚟越痛苦，然後慢慢死去」。其實我只係想唔痛，我想有一日可以得到一絲輕鬆，所有唔舒服嘅感覺同痛楚都無曬，可以安安靜靜咁躺喺自己張床上。過去八個月以嚟，我每日都係處於痛楚同埋好多唔舒服嘅感覺當中，無時無刻都伴隨住我，我真係活得好攰、好無意義。

其實我一直都好努力咁同病魔搏鬥，雖然痛楚一浪接一浪，但我冇放棄過。每一次痛楚嘅來臨，我都咬緊牙關，期望自己可以捱過去。即使身體不停發抖、用唔到力又痛，甚至連咀嚼都變得困難，我仍然堅持住，冀望有一日可以重獲健康。

我每日都同自己講，再捱一吓，可能明天會好啲。雖然過去八個月以嚟，痛楚同唔舒服嘅感覺無時無刻都伴隨住我。但我希望個天可以停止對我嘅考驗，畀我有機會好返，脫離呢個無止境嘅折磨。希望個天可以聽到我嘅心聲，畀我一絲輕鬆。即使面對咁多困難，我都會繼續努力，因為我冀望著總有一日，一切會變好。」

呢個PO一出，唔少網民都留言支持佢，例如「加油呀～ 知道你已經好叻，捱咗好多苦，希望留言可以帶俾你少少嘅支持，我平時好少留言俾人㗎」、「你很堅強! 好叻! 要撐住呀! 正能量滿滿! praying」、「加油，求天父醫治，減輕痛楚，打抵癌細胞，早日康復」、「你已經好叻仔，好堅強！一定會慢慢康復的」及「Koba一直都好堅強，真係唔容易。願你情況好轉」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！