中年好聲音3︳80歲羅秀蘭打破吳大強高齡紀錄 137位參加者連洋人都入圍

TVB綜藝《中年好聲音》舉行兩季反應唔錯，兩屆學員都頗受觀眾喜愛，大台當然接力搞第3季。早前海選後，《中年好聲音3》首輪入圍嘅137名參加者星期日首度露面，佢地將分為香港區、大灣區、新馬區及全球好聲音，而「港區代表」再分為顏值擔當、唱家班、唱將及SUPER Senior幾個類別。

第一季嘅吳大強以71歲之齡參加《中年好聲音》成為最年長參加者，其「長老」地位今季被搶走！80歲嘅家庭主婦羅秀蘭成功入圍，更打破吳大強紀錄成為最年長參加者。羅秀蘭已經三代同堂，惜丈夫去年逝世，羅秀蘭話先生好鍾意聽佢唱歌，所以參賽係要唱俾亡夫聽。另一位來自新馬地區嘅傅開成今年74歲，職業係攝影師，原來佢早喺1968年就參加歌唱比賽，退休後先再「出山」，4年前更贏得新加坡電視台歌唱比賽冠軍。羅秀蘭同傅開成被派入SUPER Senior組，同組更有歐瑞強細佬歐瑞明。

上屆冠軍古淖文一參賽就被視為「顏值擔當」，今屆《中3》直情開一組俾外表出眾嘅參加者，當中包括同劉以達夾過band嘅鍾凱瑩、被稱為「翻版沈震軒」嘅40歲爆肌男李創偉。李創偉參加過《亞洲星光大道4跳舞吧》，又參演過譚嘉儀、溫碧霞嘅MV。

而「全球好聲音」有來自各地嘅參加者，35歲美妝推銷員馮月芊來自澳門，佢話係因為「同鄉」古淖文啟發佢再一次追夢。36歲自由工作者徐殷妍以英國代表入圍，佢5年前移居當地，喺香港時做過model仲參加過新秀。另一名來自英國嘅Dan James係洋人，多年前曾來港busking，並在中港兩地演出，但因為疫情而要回國，後來得知有《中年好聲音》後決心參賽。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！