于洋自爆無綫告别作《異搜店》戲分少、角色唔適合 僅為還騷接拍坦言無癮

73歲資深演員于洋效力無綫電視30年，除咗多飾演皇帝、爸爸等角色，與薛家燕於劇集《真情》飾演一對亦令人印象深刻，不過佢喺前年9月已約滿離巢；近日于洋接受媒體訪問時，透露約滿前最後一套拍攝嘅劇集《異搜店》戲分極少，感到無癮，接拍亦只係因為要還騷；亦表示當初約滿時，太太已催促佢提早退休，但因接拍《家族榮耀》而延後，宜家已決定下月返加拿大。

于洋喺熱播劇《金宵大廈2》單元「七樓半」中飾演陳生力，講述佢與三名朋友以長命契方式買入一個單位，朋友逐一離世，只係剩下佢同一個朋友。不過鍾意飲珍珠奶茶嘅陳生力意外被鋼質飲管插死，仲成為詐屍。阿仔（鄭子誠飾）同阿孫（曾展望飾）為單位嘅業權而不顧親情，刻意隱瞞佢已經死去。最後更發生離奇嘅人體自燃事件，三爺孫齊齊被燒死。唔少網民睇完都大讚佢演出精彩，對角色留下深刻印象。

于洋離開無綫時曾表示，無綫每年畀佢嘅人工加幅有逾十多個百分比，不過佢就認為人工已見頂，亦指公司每個月要演員還騷，就算唔啱都要塞畀演員，所以佢直言爭人騷就要還，為咗好來好去，即使《異搜店》二手店店員一角對白少又唔適合自己都照拍；坦言過唔到戲癮，又認為隨便搵個人去演都可以。于洋又曾表示，無綫好多時劇本亂咁嚟，但更大問題係唔識留住人才，認為要畀演員合理待遇，例如拍無綫劇成日無時間瞓覺，但外面嘅劇組就起碼會畀10小時休息時間，亦唔會壓低太多人工；亦指出喺深圳拍攝《家族榮耀》時，劇組安排套房畀佢住，令佢印象好深刻。

《家族榮耀》馬世宏一角都係于洋近年中意又戲分重嘅角色，指由於自己唔係天生記性好嘅演員，所以要花時間消化角色，於是喺隔離期間，將劇本睇完再睇。于洋亦分享，接拍《家族榮耀》前本身已打算返加拿大，但當佢同監製道別時，對方就指有新劇角色適合佢，於是最終咩條件都無傾就去咗簽約，令退休返加拿大計劃延後。雖然于洋下月返加拿大，但有指《家族榮耀》將原班人馬開拍新劇，于洋就表示自己可能幾個月後會回來，已經叫咗該班底開劇打電話畀佢。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！